काठमाडौं, चैत १७ :
वरिष्ठ पत्रकार, लेखक तथा कूटनीतिज्ञ कमल कोइरालाको निधन भएको छ । सिंनामंगलस्थित केएमसी अस्पतालमा उपचारका क्रममा उनको ८७ वर्षको उमेरमा आइतबार साँझ निधन भएको हो ।
पक्षाघात भएर लडेपछि उनलाई अस्पताल भर्ना गरिएको थियो । उनी पूर्वप्रधानमन्त्री मातृकाप्रसाद कोइरालाका छोरा एवं बीपी कोइरालाका भतिजा हुन् । किशोर उमेरदेखि कमल वामराजनीतिमा सक्रिय थिए । बाबु प्रधानमन्त्री छँदै उनी तत्कालीन नेपाल कम्युनिस्ट पार्टीमा सक्रिय हुँदा गिरफ्तारसमेत भएका थिए ।
लामो समयदेखि पत्रकारिता एवं लेखनमा सक्रिय कोइराला नेपालका लागि कोरियाको राजदूतसमेत बनेका थिए ।
वरिष्ठ पत्रकार किशोर श्रेष्ठका अनुसार भोलि (सोमबार) ११ बजे नेकपा एकीकृत समाजवादीको केन्द्रीय कार्यालयमा श्रद्धाञ्जली सभा गरिनेछ ।
