सहकारी ठगी अभियोगमा पुर्पक्षका लागि थुनामा रहेका रास्वपाका सभापति रवि लामिछानेका तर्फबाट सर्वोच्च अदालतमा परेको बन्दीप्रत्यक्षीकरणको निवेदन न्यायाधीश हरिप्रसाद फुँयालले नहेर्ने भएका छन् ।
लामिछानेको निवेदन फुँयालले नहेर्ने भएपछि त्यसमाथिको सुनुवाइ पनि आजका लागि स्थगित भएको छ । निवेदनको प्रारम्भिक सुनुवाइका लागि न्यायाधीश फुँयालको इजलासमा पेसी तोकिए पनि उनले उक्त मुद्दा नहेर्ने बताएका हुन् ।
आफूलाई गैरकानुनी थुनामा राखेको दाबी गर्दै लामिछानेले पत्नी निकिता पौडेलमार्फत आइतबार सर्वोच्चमा बन्दीप्रत्यक्षीकरण निवेदन दिएका थिए ।
बुटवलको सुप्रिम सहकारी ठगीसम्बन्धी मुद्दामा जिल्ला अदालत रुपन्देहीले रविलाई १ करोड धरौटीमा रिहा गरेको थियो । उक्त आदेश उच्च अदालतले चैत २२ गते बदर गरेर थुनामै पठाउन भनेको थियो । आदेशलगत्तै लामिछाने काठमाडौंबाट पक्राउ परेका थिए । उनी अहिले रुपन्देही कारागारमा छन् ।
