अमेरिकी राष्ट्रपति डोनाल्ड ट्रम्पले युरोपेली संघसँग करसम्बन्धी वार्ताको समयसीमा बढाउन सहमति जनाएका छन् । उनले आफ्नो ट्रुथ सोसल अकाउन्टमा यसबारे जानकारी दिएका हुन् ।
ट्रम्पले युरोपेली संघसँग करसम्बन्धी वार्ताको समयसीमा जुलाई ९ सम्म बढाउन सहमत भएको बताएका छन् ।
यसअघि युरोपेली आयोगका अध्यक्ष उर्सुला भोन डेर लेयनले पनि आइतबार ट्रम्पसँग फोनमा कुराकानी भएको जानकारी दिएकी थिइन् ।
उर्सुला भोन डेर लेयनले एक्समा लेखेकी छिन्, ‘राष्ट्रपति ट्रम्पसँग राम्रो कुराकानी भयो । ईयू र अमेरिकाको संसारमा सबैभन्दा महत्त्वपूर्ण र घनिष्ठ व्यापार सम्बन्ध छ । युरोप वार्तालाई छिटो र निर्णायक रूपमा अगाडि बढाउन तयार छ । राम्रो सम्झौतामा पुग्न हामीलाई जुलाई ९ सम्म चाहिन्छ ।’
उर्सुलासँगको फोनबारे पनि ट्रम्पले खुलासा गरेका छन् । उनले ट्रुथ सोसियलमा लेखेका छन, ‘आज मलाई युरोपेली आयोगका अध्यक्ष उर्सुला भोन डेर लेयनबाट फोन आएको छ, जसमा उनले मलाई व्यापार र युरोपेली संघको सम्बन्धमा ५० प्रतिशत करका लागि जुन १ को समयसीमा बढाउन आग्रह गरेकी छिन् । म जुलाई ९, २०२५ सम्मको समयसीमा बढाउन सहमत भएको छु ।’
गत महिना ट्रम्पले अधिकांश ईयू सामानहरूमा २० प्रतिशत कर लगाउने घोषणा गरेका थिए । पछि वार्ताका लागि समय दिँदै जुलाई ८ सम्ममा भन्सार दर १० प्रतिशतमा घटाइयो ।
यद्यपि शुक्रबार ट्रम्पले युरोपेली संघसँगको वार्ताको गतिप्रति निराशा व्यक्त गर्दै ५० प्रतिशत कर (ट्यारिफ) लगाउने धम्की दिए । त्यसपछि अब वार्ताको समयसीमा बढाइएको खबर आएको छ । -बीबीसी
.jpg)
