प्रधानमन्त्री केपी शर्मा ओली र कांग्रेस सभापति शेरबहादुर देउवाबीच आज बिहान प्रधानमन्त्री निवास बालुवाटारमा भएको छलफलले गृहमन्त्री रमेश लेखकले राजीनामा दिनु नपर्ने निष्कर्ष निकालेको छ।
छलफलमा गृहमन्त्री लेखक आफैं पनि सहभागी थिए। बैठकमा सत्तापक्षका नेताहरूले संसदमा उठेका विषयमा गृहमन्त्रीलाई स्पष्ट पार्न दिने वातावरण बनाउन विपक्षी दलहरूलाई आग्रह गर्ने निर्णय गरेका छन्।
सत्तारूढ दलका मुख्य सचेतक महेश बर्तौलाले संसद् सञ्चालनमा विपक्षीको सहयोग आवश्यक रहेको बताए। उनले भने, “भोलि बजेट ल्याउनुछ, आज आर्थिक सर्वेक्षण पेस गर्नुछ। एउटा कर्मचारीको विषय उठाएर संसद् अवरुद्ध गर्नु ठीक होइन। गृहमन्त्रीले जवाफ दिन चाहनु भएको छ, त्यसका लागि माहोल बनाउनुपर्छ।”
हिजो संसद् प्रमुख प्रतिपक्षी दलको आग्रहमा स्थगित गरिएको उल्लेख गर्दै बर्तौलाले आज भने सदन अघि बढाउन सबैको सहयोग आवश्यक रहेको बताए।
