जिल्ला प्रशासन कार्यालय काठमाडौंले भोलिका लागि सत्तारुढ नेकपा (एमाले) र राजावादी समूहको प्रदर्शनका लागि छुट्टाछुट्टै समय तोकेको छ।
जिल्ला सुरक्षा समितिको बैठकले एमालेलाई दिउँसो २ बजेसम्म गणतन्त्र दिवसको उत्सव मनाउन अनुमति दिएको छ भने त्यसपछि राजावादी समूहलाई प्रदर्शन गर्न समय निर्धारण गरिएको हो।
दुवै पक्षले रत्नपार्क क्षेत्रलाई केन्द्र बनाएर कार्यक्रम गर्ने अडान लिएपछि प्रमुख जिल्ला अधिकारी ऋषिराम तिवारीको संयोजनमा एमालेलगायत राप्रपा अध्यक्ष राजेन्द्र लिङ्देनसँग छलफल गरेर सहमति जुटाइएको हो।
राजावादीले संघीयता खारेज, राजतन्त्र र हिन्दू राष्ट्र पुनःस्थापनाजस्ता मागसहित सात ठाउँबाट र्याली निकाल्ने तयारी गरेका छन्। हरेक प्रदेशबाट छुट्टाछुट्टै र्यालीसहित शीर्ष नेताहरूको नेतृत्व रहनेछ।
काठमाडौं प्रहरी प्रमुख एसएसपी विश्वराज अधिकारीले सम्भावित अप्रिय घटना रोक्न कडा सुरक्षा व्यवस्था मिलाइएको जनाएका छन्। ‘कानुनअनुसारका कार्यक्रमलाई सुरक्षा दिने र उल्लंघन भए कारबाही हुने’ एसएसपी अधिकारीले बताएका छन्।
एमाले सांस्कृतिक कार्यक्रममार्फत गणतन्त्र उत्सव मनाउने तयारीमा छ भने राजावादीले सोही स्थानमा अहिलेको शासन व्यवस्थाविरुद्ध आक्रोश पोख्ने जनाएका छन्।
