काठमाडौं जिल्ला प्रशासन कार्यालयले नारायणहिटी दरबार संग्रहालय क्षेत्रमा निषेध आदेश जारी गरेको छ । राजावादीको आन्दोलनलाई लक्षित गर्दै दरबार क्षेत्रमा निषेधाज्ञा जारी गरिएको हो ।
भोलि (शनिबार) देखि असार २४ गतेसम्मका लागि निषेध आदेश जारी गरिएको हो ।
केशरमहल चोकदेखि नारायणहिटी दरबार संग्रहालय दक्षिण गेट हुँदै जय नेपाल मोडसम्म र महेन्द्र सालिक हुँदै नारायणहिटी दरबार संग्रहालय दक्षिण गेटसम्म निषेध आदेश जारी गरिएको छ ।
प्रमुख जिल्ला अधिकारी ऋषिराम तिवारीद्वारा जारी आदेशमा पाँच जनाभन्दा बढी व्यक्ति भेला भई अनशन, धर्ना, घेराउ, जुलुस, प्रदर्शन तथा सभा जस्ता विरोधका कार्यक्रम गर्न नपाइने उल्लेख छ ।
राजावादीहरूले शनिबार नारायणहिटी दरबार संग्रहालयअगाडि विरोध प्रदर्शन गर्ने जानकारी पाएपछि निषेध आदेश जारी गरिएको हो ।
यसअघि २०८१ फागुन २६ गते पूर्वराजा ज्ञानेन्द्र शाह पोखराबाट फर्किनुअघि काठमाडौंका विभिन्न स्थानमा निषेधाज्ञा थपिएको थियो ।
