पतञ्जलि जग्गा प्रकरणमा भ्रष्टाचार मुद्दा खेपिरहेका एकीकृत समाजवादीका अध्यक्ष तथा पूर्वप्रधानमन्त्री माधवकुमार नेपालले प्रधानमन्त्री केपी शर्मा ओलीप्रति कडा टिप्पणी गरेका छन्।
आइतबार पार्टीको बागमती प्रदेश कमिटी बैठकमा बोल्दै उनले सरकार बदला लिने सोचबाट चलिरहेको आरोप लगाए।
‘वर्तमान सरकार बदलाको भावना बोकेर सञ्चालित छ,’ नेपालले भने, ‘सरकारले यो वा त्यो बहानामा बदला लिने उद्देश्य नराखोस्। ओलीजीले बदलाको राजनीति छोड्नुपर्छ।’
नेपालले पार्टी कार्यशैलीप्रति पनि आलोचना गर्दै कार्यकर्तालाई ‘झोले’होइन, असली कार्यकर्ता बनाउनुपर्नेमा जोड दिए। ‘
पतञ्जलि प्रकरणमा आफू निर्दोष रहेको दाबी गर्दै नेपालले कानुनी प्रक्रिया सम्मान गर्ने बताए। ‘अख्तियारले विशेष अदालतमा मुद्दा दायर गरेको छ। अनुसन्धान हुँदै जाला। मैले अनुसन्धान नहोस् भनेको छैन,’ उनले भने, ‘हामी सुशासनको पक्षमा छौं। पुराना हजार पृष्ठभन्दा बढीका दस्तावेज कानुनी टोलीले अध्ययन गरिरहेको छ। कानुनी उपचारबाट सत्य बाहिर आउँछ।’
पूर्वप्रधानमन्त्री नेपालले आफू सधैं भ्रष्टाचारविरुद्ध र सुशासनको पक्षमा उभिएको दाबी गर्दै वर्तमान सरकारप्रति खबरदारी जारी रहने चेतावनीसमेत दिए।
