हुम्ला जिल्ला अस्पतालमा पछिल्लो समय बिरामीको चाप बढेको छ ।
मौसमी रुघाखोकीका बिरामी बढ्दा अस्पतालमा बिरामीको अत्यधिक चाप भएको अस्पतालले जनाएको छ ।
मौसमी बिरामीको चाप अत्यधिक बढेसँगै अस्पतालमा बिरामी राख्ने शैयाको पनि अभाव हुन थालेको अस्पतालका डाक्टर सुनिल पुजारले बताउनुभयो ।
१५ शैयाको क्षमता भएको हुम्ला अस्पतालमा हिजो आज बिरामी बढी भर्ना हुँदा समस्या भएको उहाँको भनाइ छ ।
अस्पतालमा आइतबार मात्रै एक सय ५० जना बिरामीले उपचार गराएका छन् । जसमा सबैभन्दा बढी ज्वरो, झाडापखाला, निमोनिया र ग्याष्ट्रिक लगायतका बिरामी छन् ।
सोमबार साँझ ४ बजेसम्म झण्डै ९० जना बिरामीको उपचार गरिएको अस्पतालले जनाएको छ ।
केही दिनअघि दैनिक ५० जनासम्म उपचारका लागि पुग्ने गरेको भएपछि पछिल्ला दिनमा मौसमी रुघाखोकी, ज्वरोका बिरामी बढ्ने गरेको डा पुजाराले बताउनुभयो ।
जिल्ला अस्पतालमा उपचारका लागि सदरमुकाम आसपास गाउँका ठेहे, जोदाम, डाँडाफया, धारापोरी, बुराउँसे, बरगाउँ, यांचु, माजा, छिप्रा लगायत गाउँबाट पुग्ने गरेका छन् ।
अहिले जिल्ला अस्पतालमा बिरामीको चाप बढेको भए पनि औषधि अभाव नभएको अस्पतालले जनाएको छ ।
