नेकपा एमालेको सचिवालय बैठक बस्दै छ । पार्टी केन्द्रीय कार्यालय च्यासलमा बिहीबार दिउँसो १ बजे बस्ने बैठकमा आगामी भदौमा हुने विधान महाधिवेशनको तयारीका विविध विषयहरूमा छलफल र निर्णयहरू हुने जनाइएको छ ।
बैठकमा उपप्रधानमन्त्री एवं पार्टी उपाध्यक्ष विष्णुप्रसाद पौडेलले विधान संशोधनको प्रस्तावका खाकाहरू प्रस्तुत गर्नेछन् ।
अध्यक्ष केपी ओलीले प्रस्तुत गर्ने राजनीतिक प्रतिवेदन, महासचिव शंकर पोखरेलले प्रस्तुत गर्ने सांगठनिक प्रतिवेदनका विषयमा पनि छलफल हुनेछ ।
बैठकले पार्टीमा वरिष्ठ उपाध्यक्ष पद नै नरहने गरी विधानमा संशोधनको तयारी थालेको छ । पूर्वराष्ट्रपति विद्या भण्डारीको पक्षमा खुलेका वरिष्ठ उपाध्यक्ष ईश्वर पोखरेलेको पद नै खारेज हुने भएको हो । भण्डारीको पक्षमा पोखरेल खुलेपछि एमाले अध्यक्ष ओली उनीसँग रुष्ट छन् ।
एमालेले आगामी भदौ २०, २१ र २२ गते ललितपुरको गोदावरीमा दोस्रो विधान महाधिवेशन गर्ने निर्णय गरिसकेको छ । एमालेमा पछिल्लो समय ७० वर्षे उमेर हद र अध्यक्षको २ वर्षे कार्यकालबारे विवाद चर्किँदै गएको छ ।
