नक्कली भुटानी शरणार्थी प्रकरणमा पक्राउ परेका पूर्वसांसद टोपबहादुर रायमाझी कारागार फर्केका छन्। भदौ २४ मा ‘जेनजी आन्दोलन’का क्रममा काठमाडौंको सुन्धारास्थित केन्द्रीय कारागार (सेन्ट्रल जेल) बाट निस्किएका उनी करिब दुई सातापछि मंगलबार डिल्लीबजार कारागारमा हाजिर भएका हुन्।
कारागार व्यवस्थापन विभागले कैदीबन्दीलाई अनुकूल हुने नजिकको कारागारमा आफैँ उपस्थित हुन आग्रह गरेपछि उनी त्यहाँ पुगेका हुन्।
सेन्ट्रल जेलमा तोडफोड र आगजनी हुँदा उनको सम्पूर्ण बन्दोबस्तीका सामान नष्ट भएको हुँदा अहिले लुगाफाटोसहित कारागारमा फर्किएका छन्।
उनी नक्कली भुटानी शरणार्थी बनाएर अमेरिका लैजाने प्रकरणमा संलग्न रहेको अभियोगमा पुर्पक्षका लागि थुनामा छन्।
जेनजी आन्दोलनका क्रममा देशभरका विभिन्न कारागारबाट करिब १४ हजारभन्दा बढी कैदीबन्दी निस्केका थिए। कारागारबाट धमाधम सूचना जारी भएपछि बन्दीहरु धेरैजसो सम्बन्धित कारागार फर्केका छन् भने केही अझै फरार छन्।
