हेटौंडा, कात्तिक १० :
मकवानपुरको मनहरी गाउँपालिका– ७ लच्कामा भारतीय ग्यास बुलेटको ठक्करबाट स्कुटर चालकको मृत्यु भएको छ । स्कुटरमा सवार बालकसहित दुई जना घाइते भएका छन् ।
बुलेटको ठक्करवाट सिन्धुपालचोक चौतारा नगरपालिका–५ का ३० वर्षीय स्कुटर चालक केदार श्रेष्ठको मृत्यु भएको छ । घाइते हुनेमा स्कुटरमा सवार उनकी २८ वर्षीया पत्नी सरस्वती श्रेष्ठ र २ वर्षीय छोरा प्रविन श्रेष्ठ रहेका छन् ।
उनीहरुको चितवनस्थित एलाइभ अस्पतालमा उपचार भइरहेको प्रहरीले जनाएको छ । सरस्वतीको अवस्था गम्भिर रहेको र छोरा प्रविनको अवस्था सामान्य रहेको प्रहरीले जनाएको छ ।
श्रेष्ठ दम्पती र छोरा चितवनवाट हेटौंडातर्फ स्कुटरमा आउँदै थिए । ग्यास बुलेट चालक भारत बिहारका ५५ वर्षीय मोहमद मतिनलाई ईलाका प्रहरी कार्यालय मनहरीले नियन्त्रणमा लिएको छ ।
