मतदानको गणना सुरु, तीन घण्टाभित्र मत परिणाम सार्वजनिक गरिने

नेकपा एमालेको ११ औँ महाधिवेशन अन्तर्गत भएको मतदानको गणना सुरु भएको छ ।

तीन घण्टाभित्र मत परिणाम सार्वजनिक गरिने केन्द्रीय निर्वाचन आयोगका उपाध्यक्ष सानु राजा पोखरेलले जानकारी दिए ।  निर्वाचनमा जम्मा २ हजार २ सय ६३ मतदाता रहेकामा २ हजार २ सय २७ मत खसेको थियो । ३६ जना भने मतदानमा अनुपस्थित रहेका  थिए ।

बुधबार बिहान ९ बजेदेखि सुरु भएको मतदान आज बिहान ७ बजे मात्रै सकिएको थियो।  

अध्यक्ष पदका लागि केपी शर्मा ओली र ईश्वर पोखरेलबिच प्रतिस्पर्धा छ ।

त्यस्तै शक्तिशाली मानिने महासचिव पदमा शंकर पोखरेल र सुरेन्द्र प्रसाद पाण्डे प्रतिस्पर्धामा छन् ।

सबै पदको नतिजा एकसाथ सार्वजनिक गर्ने आयोगको तयारी छ । २ हजार २ सय ६३ प्रतिनिधिमा २ हजार २ सय २७ मत मात्र खसेको निर्वाचन आयोगले जनाएको छ ।  यो ९८.०४ प्रतिशत हो । ३६ जना भने मतदानमा अनुपस्थित रहेका छन् ।

एमालेमा ३०१ केन्द्रीय सदस्यीय लागि करिब ६४२ जनाको उम्मेदवारी  परेको थियो । मतदानमा ८० वटा विद्युतीय भोटिङ मेसिन प्रयोगमा गरिएको थियो ।