नेपाली कांग्रेसका नेता डा. शेखर कोइरालाले नेपालमा छिमेकी मुलुक तथा विश्वका शक्तिशाली देशहरूको चलखेल रहेको दाबी गरेका छन्।
काठमाडौंको थापागाउँमा मंगलबार आयोजित मोरङ समाज काठमाडौंको साधारणसभा उद्घाटन समारोहलाई सम्बोधन गर्दै उनले नेपालको भौगोलिक अवस्थिति रणनीतिक भएकाले विदेशी चासो स्वाभाविक रहेको बताए।
‘नेपाल जहाँ अवस्थित छ, एकदमै स्ट्राटेजिक लोकेसनमा छ। विश्वमा नेपालजस्तो रणनीतिक स्थानमा रहेका देश धेरै छैनन्,’ कोइरालाले भने, ‘हाम्रो उत्तर र दक्षिणमा दुई ठूला छिमेकी छन् र विश्वका शक्तिशाली देशहरूको पनि यहाँ चलखेल छ।’
उनले नेपालमा विदेशी चलखेल छैन भनेर नकार्न नमिल्ने स्पष्ट पारे। विदेशी शक्तिहरूले नेपाली राजनीतिप्रति चासो र चिन्ता दुवै राखेको कोइरालाको भनाइ छ।
कोइरालाले विदेशी शक्तिहरूले सधैं नेपाली नेताहरूलाई जनताप्रति जिम्मेवार बन्न र जनताको काम इमान्दारितापूर्वक गर्न सुझाव दिँदै आएको पनि बताए। उनले दलका नेताहरू आफ्नै स्वार्थ र सत्ता टिकाइराख्न गलत निर्णय लिने प्रवृत्ति बढेकोप्रति पनि आलोचना गरे।
आगामी दिनमा बन्ने सरकारहरूले गलत कामलाई प्राथमिकतामा नराख्ने र गलत गर्नेहरूलाई दण्डित गर्ने प्रतिबद्धता जनाए।
