बागमती प्रदेशका मुख्यमन्त्री किरण थापा मगरले विपद् व्यवस्थापन, राहत वितरण तथा पुनर्निर्माणका सम्बन्धमा संघीय सरकारसंगको समन्वयमा प्रदेश सरकारले काम गरिरहेको बताएका छन् ।
सोमबार ललितपुरमा पत्रकार सम्मेलन गर्दै मुख्यमन्त्री थापाले संघीय सरकारले राहत सामग्री संकलन गर्ने, प्रदेश सरकारले समन्वय र सहकार्य गर्ने तथा स्थानीय सरकारले वितरण गर्ने गरी जिम्मेवारी तय भन्दै सोहि अनुसार प्रदेश सरकारले काम गरिरहेको बताएका हुन्।
उनले राहत वितरणलाई व्यवस्थित बनाउन स्थानीय तहमा राजनीतिक दल, जनप्रतिनिधि र कर्मचारी सम्मिलित संयन्त्रमार्फत एकद्वार प्रणालीबाट राहत वितरण सुरु गरिएको जानकारी दिए । भाद्र १२ गते नै प्रदेश सरकारको पहलमा बाटो मर्मत गरी रसुवासम्म खाद्यान्न तथा राहत सामग्री पु¥याइएको उनले बताए ।
उनले आवागमन सहज बनाउन आवश्यकता अनुसार तुइन, झोलुङ्गे पुल र रसुवा जोड्ने अस्थायी संरचनाको सम्पूर्ण खर्च प्रदेश सरकारले व्यहोर्ने निर्णय भएको जानकारी दिए । त्यस्तै रसुवालाई १ करोड, नुवाकोटलाई १ करोड, धादिङलाई ५० लाख र चितवनलाई ५० लाख रुपैयाँ उपलब्ध गराउने निर्णय भएको उनले बताए ।
मुख्यमन्त्री थापाले अभिभावक गुमाएका तथा घरबारविहीन बालबालिकाका लागि आवासीय विद्यालय सञ्चालन गरी इसिडी देखि कक्षा १२ सम्मको सम्पूर्ण खर्च प्रदेश सरकारले व्यहोर्ने निर्णय भएको बताए ।
उहाले त्रिशूली नदीमा रहेका १४० मिटरभन्दा लामा पुलहरू, साना पुलहरू तथा झोलुङ्गे पुलहरू ध्वस्त भएकाले तिनको पुनर्निर्माण आवश्यक रहेकाले स्थानीय तहले जग्गा उपलब्ध गराएपछि आवश्यक पर्ने बाटो, खानेपानी, विद्यालय र अस्पताल जस्ता पूर्वाधार निर्माणमा संघीय र प्रदेश सरकारले हातेमालो गरेर काम अघि बढाउने धारणा राखे ।
