काँग्रेसको मूल चुनौती पार्टी व्यवस्थापन रहेको नेता सिंहको भनाइ

नेपाली काँग्रेसका नेता प्रकाशमान सिंहले पार्टीको व्यवस्थापन नै काँग्रेसका लागि मूल चुनौती रहेको बताउनुभएको छ । 

नेपाली काँग्रेसको सय दिने विशेष अभियानअन्तर्गत काँग्रेस काठमाण्डौंँ महानगर समितिले क्षेत्रपार्टीमा आज आयोजना गरेको महानगरस्तरीय भेलालाई सम्बोधन गर्दै उहाँले अहिले काँग्रेसका लागि पार्टीलाई व्यवस्थापन गर्न सक्ने कि नसक्ने भन्ने मुख्य सवाल रहेको र क्रियाशील सदस्यको सङ्ख्या धेरै भएको तर, उनिहरुलाई सदस्यताको महत्व बुझाउन जरुरी उल्लेख गर्नुभयो ।

हरेक क्रियाशील सदस्यलाई पार्टीको गतिविधिमा संलग्न गराउनुपर्नेमा नेता सिंहले जोड दिनुभयो । देशमा प्रजातन्त्र र प्रजातान्त्रिक मूल्य मान्यता ल्याउन धेरै सङ्घर्ष गरेको र जनताको पटक- पटक विश्वास जितेको काँग्रेस पार्टीको क्रियाशील सदस्यता सामान्य विषय नभएको उहाँले बताउनुभयो । पार्टीभित्र समस्या भए बसेर समाधान गर्नुपर्ने उहाँले उल्लेख गर्नुभयो । 

काठमाण्डौँवासीले भोगेका पीर मर्का र समस्या समाधान गर्नतर्फ लाग्न नेता सिंहले काठमाण्डौँ महानगर समितिलाई आग्रह गर्नुभयो । एक सय दिने विशेष अभियानले पार्टी सङ्गठन सुदृढीकरण गर्न सहयोग पुग्ने उहाँले विश्वास व्यक्त गर्नुभयो । 

काठमाण्डौँ काँग्रेसको सय दिने विशेष अभियानका लागि नेता कृष्णप्रसाद सिटौला खटिनुभएको छ ।