आज माघे सङ्क्रान्ति पर्व । सूर्य धनु राशिबाट मकर राशिमा प्रवेश गर्ने सङ्क्रान्ति भएकाले आजको दिनलाई मकर (माघे) सङ्क्रान्ति भनिन्छ ।
आज देवघाट, त्रिशूली, कालीगण्डकी, बागमती, इन्द्रावती, त्रिवेणी, रिडीलगायत स्थानमा माघ स्नान गर्ने भक्तजनको घुइँचो लागेको छ ।
यी ठाउँमा आज विशेष मेलासमेत लाग्ने गर्छ । यसैगरी काठमाडौं उपत्यकाभित्र रहेका शिवालय तथा मठ-मन्दिरहरुमा पनि बिहानैदेखि भक्तजनको घुइँचो लागेको छ ।
आजदेखि सूर्य उत्तरायण हुने भएकाले उत्तरायण सुरु हुने दिनमा स्नान, जप, तप, ध्यान साधना, दान आदि गरेमा पुण्य मानिन्छ ।
यसैबीच तराईवासीले माघ १ लाई नहान अर्थात् नुहाउने पर्वका रूपमा मनाउँछन् । तराईवासीले आज अनिवार्य नुहाउनुपर्ने मान्यता राख्छन् ।
बिहानै तीर्थस्थलमा गई स्नान गरेर तील दान गर्नाले सुन दान गरेसरहको पुण्य प्राप्त हुने धार्मिक विश्वास छ ।
माघे सङ्क्रान्तिका दिन घिउ, चाकु, तिलका परिकार, खिचडी नखाए, दान नगरे, जलाशयमा गई स्नान नगरे व्यक्ति जीवनभर रोगी हुने विश्वास रही आएको छ ।
हेरौं थप तस्बिर :
