नेपालगन्ज म्याराथनका संस्थापक टीएस ठकुरी विश्व म्याराथनको साझा संस्था एसोसियसन अफ इन्टरनेसनल म्याराथन एन्ड डिस्टेन्स रेस (एम्स) को दूत नियुक्त भएका छन् ।
एम्सका नवनिर्वाचित अध्यक्ष पाको बोराओले हालै ठकुरीलाई नेपालका लागि एम्सको दूत नियुक्त गरिएको मनोनयन पत्र पठाएका हुन् । ‘हामी तपाईंसँगको सहकार्यले विश्वभर रोड रनिङलाई प्रोत्साहन र प्रवर्धन गर्ने एम्सको लक्ष्य प्राप्ति हुने अपेक्षा गर्दछौं,’ अध्यक्ष बोराओले पत्रमा उल्लेख गरेका छन्, ‘तपाईंको नेपालगन्ज म्याराथन आयोजकका रुपमा लामो समयको अनुभवलाई आत्मसात् गर्दै हालै सम्पन्न एम्सको वर्ल्ड कंग्रेसमा तपाईंको उत्कृष्ट प्रस्तुति हेरेपछि हामी तपाईंलाईं नेपालका लागि दूत नियुक्त गर्ने निर्णयमा पुगेका हौं । तपाईंले नेपालमा रोड रनिङको विकासमा एम्सको प्रतिनिधित्व गर्दै समन्वय गर्नुहुनेछ भन्ने अपेक्षा गरेका छौं ।’
नेपालगन्ज म्याराथन नेपालबाट एम्सको पूर्णकालीन सदस्यता प्राप्त गर्ने पहिलो म्याराथन आयोजक हो । एम्सको इतिहासमा पहिलोपटक जापानको ओसाकामा भएको २३औं वर्ल्ड कंग्रेसमा ठकुरीले नै भाग लिएका थिए । विश्व समुदायलाई नेपालसम्बन्धी जानकारी गराउन ठकुरीले नेपाल रनिङ म्यागजिनसमेत प्रकाशन गर्दै आएका छन् ।
एम्सको दूतका रुपमा ठकुरीले एम्सका सदस्यता विषयमा नेपालभित्र रेस डाइरेक्टर तथा आयोजकलाई सूचित गर्नुपर्नेछ । साथै एम्सका गतिविधिलाई समन्वयकर्ताका रुपमा कार्य गर्नु, रनिङ समुदायमा हुने विवाद वा त्यस्ता विषयबारे एम्सको बोर्डसमक्ष निरन्तर रिपोर्टिङ गर्नुपर्नेछ । एम्सको उद्देश्य र सदस्यताबाट हुने फाइदाबारे रेस डाइरेक्टरलाई बुझाउँदै सदस्यता विस्तारलाई प्रवर्धन गर्नुपर्नेछ ।
एम्सको दूत नियुक्त भएपछि नेपालगन्ज म्याराथनका संस्थापक ठकुरीले खुसी व्यक्त गरे । यसका लागि उनले सिंगो नेपालगन्जवासीप्रति आभार प्रकट गरे । ‘धारा नेपालगन्ज म्याराथनसँग सहकार्य गर्ने राज्यका निकाय तथा प्राइभेट सेक्टर तथा समस्त सराकोरवाप्रति आभारी छु,’ ठकुरीले भने, ‘सिंगो नेपालगन्जवासीलाई धन्यवाद दिन चाहन्छु ।’
नेपालगन्ज म्याराथनको दशक यात्रा पूरा गर्ने क्रममा कर्णाली हाफ म्याराथन, नेपालगन्ज १० किमि नाइट रन, राप्तीसोनारी नेचर रन र गौघाट ग्रिन रनले आफ्नो यात्रा आरम्भ गरिसकेका छन् । बौद्धिक बहस गर्ने थलोका रुपमा नेपालगन्ज कन्क्लेभसमेत निरन्तर आयोजना हुँदै आएको छ ।
खेलकुद संस्कृति प्रवर्धनमा समर्पित भएका कारण इटालीको मिलानमा हेडक्वार्टर रहेको विश्वव्यापी संस्था फेडरेसन अफ इन्टरनेसनल सिनेमा टेलिभिजन स्पोर्ट्स (फिक्ट्स) ले समेत यअसघि ठकुरीलाई नेपालका लागि दूत नियुक्त गरिसकेको छ । अब ठकुरीले दुईवटा अन्तर्राष्ट्रिय संस्थाका लागि नेपालको दूत भएर काम गर्ने अवसर प्राप्त गरेका छन् ।
यसले भावी पुस्तालाई यी दुवै फोरम सिक्ने अवसर प्राप्त हुने ठकुरीले बताए । यी दुवै जिम्मेवारीले नेपालमा दौड संस्कृतिको प्रवर्धनमा आक्रामक ढंगले अघि बढ्दै समग्र खेलकुद संस्कृतिको विकासमा लाग्न अभिप्रेरित गरेको ठकुरीले बताए । एम्स संसारभर एक सय बीस देशमा झन्डै साढे चार सय रेस आयोजकहरु सदस्य भएको विश्वव्यापी संरचना भएको संस्था हो ।
भियतनामको हनोईमा हालै भएको एम्सको २४औं वर्ल्ड कंग्रेसमा नेपालगन्ज म्याराथनले २५औं वर्ल्ड कंग्रेस नेपालमा आयोजना गर्न दाबी पेस गर्दा ६५ मत प्राप्त गर्न सफल भएको थियो । त्यसमा नर्वेको मिडनाइट सन म्याराथनले ८७ मत प्राप्त गरी वर्ल्ड कंग्रेस आयोजनाको अधिकार लिएको थियो ।
दशौं धारा नेपालगन्ज म्याराथन गत मंसिर २२ गते सम्पन्न भएको थियो । नेपाली सेनाका खड्कबहादुर खड्काले उपाधि जितेका थिए । त्यसैगरी हाफ म्याराथनमा सन्तोषी श्रेष्ठले लगातार चौथोपटक उपाधि रक्षा गर्न सफल भइन् ।
