सुप्रिम सहकारी ठगी प्रकरणको मुद्दामा अभियुक्त रवि लामिछानेलाई बुधबार परिवारको जिम्मा लगाएकामा सरकारी वकिलले आपत्ति जनाएका छन् ।
जिल्ला सरकारी वकिल कार्यालयका प्रमुख प्रेमराज पौडेलले बहस नसकिँदै परिवारको जिम्मा लगाएको भन्दै न्यायाधीश प्रह्लादकुमार योगीलाई थुनछेक बहसको औचित्यमाथि प्रश्न उठाएका हुन् । कसुरदार रहेको पर्याप्त प्रमाण रहेको र उनलाई हिरासतमै राखेर मुद्दाको पुर्पक्ष गर्नुपर्नेमा न्यायाधीशले परिवारको जिम्मामा पठाएको भन्दै आपत्ति जनाए ।
न्यायाधीश भने यस्ता प्रचलन पहिले पनि रहेको तर्क गरेका थिए । अहिले नै कसुरदार ठहर भई नसकेको अवस्थामा उनलाई परिवारकै जिम्मामा रिहा गर्नु उचित हुने रवि पक्षका वकिलको तर्क छ । अहिले सरकारी वकिलको तर्फबाट बहस भइरहेको छ ।
खाजा ब्रेकसम्म जिल्ला सरकारी वकिल कार्यालय रुपन्देहीका प्रमुख प्रेमराज पौडेल, सहायक जिल्ला न्यायाधिवक्ताहरू गोकर्णराज घिमिरे, सुनील लामिछाने, वसन्तराज पोख्रेल र पवित्रा भण्डारीले बहस गरेका छन् ।
त्यसपछि उच्च सरकारी वकिल कार्यालय बुटवलका प्रमुख सहन्यायाधिवक्ता सोमकान्ता भण्डारी, उपन्यायाधिवक्ताद्वय प्रकाश मरासिनी र रवि न्यौपानेले बहस गर्नेछन् ।
सरकारी वकिलको बहसपछि जाहेरवालाका तर्फबाट बहस हुनेछ । वरिष्ठ अधिवक्ता दिनेश त्रिपाठी र सुरेन्द्र भण्डारीले बहस गर्नेछन् । सरकारी वकिल र जाहेरवालाका तर्फबाट जवाफी बहस भएपछि थुनछेकको आदेश आउने सम्भावना छ ।
लामिछाने केही दिनअघि मात्र सूर्यदर्शन सहकारीको मुद्दामा ६५ लाख र स्वर्णलक्ष्मी सहकारीको मुद्दामा ६० लाख रुपैयाँ धरौटीमा रिहा भएका हुन् । उनीविरुद्ध सहकारीको रकम अपलचनको विषयमा अन्य जिल्लामा पनि मुद्दा दायर भएको छ ।
