नेपाली कांग्रेसका सांसद डा. प्रकाशशरण महतले ताप्लेजुङको पाथिभरा मन्दिर पुग्नका लागि केबलकार बनाउने विषयमा भएको विवाद शान्तिपूर्ण संवादबाट टुंग्याउनुपर्ने बताएका छन् ।
प्रतिनिधिसभाको बैठकपछि सञ्चारकर्मीहरुसँग कुराकानी गर्दै शुक्रबार उनले ताप्लेजुङका बासिन्दाको परम्परा र संस्कृतिको संरक्षण हुनेगरी केबलकार बनाउनुपर्ने धारणा राखे । उनले पाथीभरामा केबलकार निर्माण गर्न सके त्यहाँको आर्थिक गतिविधि चलायमान हुने विश्वास व्यक्त गरे ।
उनले केबलकार बनाउन सके पर्यटकको संख्यामा वृद्धि हुने भएको कारण त्यहाँको स्थानीय उत्पादनले स्थान पाउने र रोजगारीको अवसरसमेत सिर्जना हुने बताए । उनले केबलकार निर्माणको विषयमा भइरहेको विवाद मिलाउन सरकार लागिपरेको समेत बताए ।
‘केबलकारले ५०औं गुणा पर्यटकको संख्या बढाउँछ । संख्या बढ्नेबित्तिकै त्यहाँको आर्थिक गतिविधि चलायमान हुन्छ । हजारौं लज खुल्छन् । त्यहाँको उत्पादनले ठाउँ पाउँछ । रोजगारी र व्यापक रुपमा प्रदान गर्न सकिन्छ । त्यहाँको सबै परम्परा र संस्कृतिको सम्मान र संरक्षण गरेर केबलकार बन्यो भने राम्रो हुन्छ,’ उनले भने, ‘त्यसका लागि सरकार लागिरहेको छ । सबै कुरा शान्तिपूर्ण संवादका माध्यमबाट टुंग्याउनुपर्छ । उहाँहरुका जायज गुनासा सरकारले पनि सम्बोधन गर्नुपर्छ ।’
ताप्लेजुङको पाथिभरा मन्दिर जाने केबलकार बनाउने विषयमा पक्ष र विपक्षबीच विवाद हुँदै आइरहेको छ ।
