वरिष्ठ पत्रकार एवं प्रेस काउन्सिल नेपालका पूर्वअध्यक्ष माथवरसिंह बस्नेतको निधनप्रति नेपाल पत्रकार महासंघले दु:ख व्यक्त गरेको छ ।
महासंघका महासचिव रामप्रसाद दाहालले विज्ञप्ति जारी गर्दै नेपाली पत्रकारिता जगत्ले एक योग्य, अनुभवी र परिपक्व पत्रकारलाई गुमाएको जनाएका छन् । ‘पत्रकारिता क्षेत्रमा लामो समय योगदान दिनुभएका बस्नेत देशान्तर साप्ताहिकका संस्थापक सम्पादक हुनुहुन्थ्यो । बस्नेतले राष्ट्रिय समाचार समिति र गोरखापत्र संस्थानमा अध्यक्षको रुपमा रही सेवा गर्नुभएको थियो । बस्नेतको निधनले नेपाली पत्रकारिता जगत्ले एक योग्य, अनुभवी र परिपक्व पत्रकारलाई गुमाएको छ,’ महासंघद्वारा जारी विज्ञप्तिमा उल्लेख छ ।
महासंघले वरिष्ठ पत्रकार बस्नेतप्रति भावपूर्ण श्रद्धाञ्जली अर्पण गर्दै समवेदना व्यक्त गरेको छ ।
मस्तिष्काघातपछि उपचारका लागि अन्नपूर्ण न्युरो अस्पतालमा भर्ना गरिएका ७७ वर्षीय पत्रकारको शनिबार उपचारकै क्रममा निधन भएको हो ।
