राष्ट्रिय स्वतन्त्र पार्टी (रास्वपा) का सभापति एवं पूर्वगृहमन्त्री रवि लामिछानेलाई भैरहवा कारागारको ४ नम्बर ब्लकमा राखिएको छ ।
कारागार प्रशासक सुरेश भण्डारीका अनुसार लामिछानेलाई कारागारमा रहेका ४ वटा ब्लकमध्ये ४ नम्बर ब्लकमै राखिएको छ । १ र २ नम्बर ब्लकमा अरु कैदी तथा थुनुवा छन् । ३ नम्बर ब्लक भने महिला कैदी तथा थुनुवाका लागि हो ।
४ नम्बर ब्लकमा अहिले लामिछानेलाई एक्लै राखिए पनि अरु कैदी आएको अवस्थामा त्यहाँ राख्न सकिने पनि भण्डारीले जानकारी दिए ।
लामिछानेलाई प्रहरीले शुक्रबार राति उनकै निवास बूढानीलकण्ठबाट पक्राउ गरी भैरहवा पुर्याएको हो । उच्च अदालत तुलसीपुरको बुटवल इजलासले शुक्रबार लामिछानेलाई सुप्रिम सहकारीको रकम ठगेको कसुरमा पुर्पक्षका लागि थुनामा पठाउन आदेश गरेको थियो । न्यायाधीशद्वय रमेश ढकाल र स्वीकृति पराजुलीको संयुक्त इजलासले रविलाई थुनामा पठाउने आदेश दिएको हो ।
अदालतमा उपस्थित गराएर प्रक्रिया पूरा भएसँगै उनलाई आज (सोमबार) भैरहवा कारागार चलान गरिएको जिल्ला प्रहरी कार्यालय रुपन्देहीले जनाएको छ ।
