सञ्चार तथा सूचना प्रविधि मन्त्री पृथ्वीसुब्बा गुरुङले नेपाल राष्ट्र बैंकको गभर्नर नियुक्ति चाँडै हुने बताएका छन् । मन्त्रालयमा आज आयोजित पत्रकार सम्मेलनमा बोल्दै मन्त्री गुरुङले गभर्नर नियुक्तिको विषयमा प्रमुख दलहरूबीच सहमति भइसकेको जानकारी दिए ।
उनले मुलुकको समग्र अर्थतन्त्र सुधार गर्ने क्षमताका व्यक्ति गभर्नर बनाउनुपर्ने भएकाले ढिलाइ भएको स्पष्ट पारे । ‘गभर्नर नियुक्तिको विषय सबै दलको चासोको विषय बन्नु अस्वाभाविक होइन,’ मन्त्री गुरुङले भने, ‘हिजो प्रधानमन्त्री तथा एमाले अध्यक्ष केपी शर्मा ओली र कांग्रेस सभापति शेरबहादुर देउवाबीच सहमति भइसकेको छ । अब संयन्त्रको बैठक बस्नेछ, र त्यसले आवश्यक नीतिगत मार्गनिर्देशन गर्ने विश्वास छ ।’
उनका अनुसार नयाँ गभर्नर नियुक्तिसँगै राष्ट्र बैंक नेतृत्वको अन्योल चाँडै अन्त्य हुने अपेक्षा गरिएको छ । त्यस्तै, मन्त्री गुरुङले सरकारले शिक्षकका जायज मागप्रति पनि गम्भीर ध्यान दिएको बताए । उनले शिक्षासम्बन्धी मागहरू सम्बोधन गर्न सरकारले संघीय संसद्को बजेट अधिवेशन आह्वान गर्न सिफारिस गरिसकेको जानकारी दिए । ‘शिक्षकको मुद्दा गम्भीर छ । सरकार संवेदनशील छ, समाधानका लागि प्रक्रिया अगाडि बढिसकेको छ,’ मन्त्री गुरुङको भनाइ थियो ।
