अख्तियार प्रमुख राईको गुनासो : सरकारले सहयोग नगर्दा विदेशमा लुकाएको सम्पत्ति फिर्ता ल्याउन सकिएन

अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले भ्रष्टाचारबाट आर्जन गरिएको सम्पत्ति विदेशबाट फिर्ता ल्याउन सरकारले सहयोग नगरेको आरोप लगाएका छन्।

संघीयता सबलीकरण तथा राष्ट्रिय सरोकार समितिको बुधबारको बैठकमा बोल्दै प्रमुख आयुक्त राईले सिंगापुर, अमेरिका र युरोपमा लुकाइएको सम्पत्ति फिर्ता गर्न ती देशहरूले सहमति जनाए पनि नेपाल सरकार गम्भीर नदेखिएको बताए।

‘सिंगापुरले मनी ट्रान्सफर गर्न सहमति जनाएको थियो, तर सरकारले कुनै पहल गरेन,’ राईले भने, "कार्यदल बने पनि काम अघि बढेको छैन।’ 

राईले गैरआवासीय नेपालीहरूमार्फत पनि उल्लेख्य मात्रामा भ्रष्टाचार भइसकेको भन्दै यसले अन्तर्राष्ट्रिय स्वरूप लिएको उल्लेख गरे। साथै, सांसदहरूलाई यसमा सक्रिय सहयोग गर्न आग्रह गरे।

उनले अनुसन्धानमा राजनीतिक दबाब नआएको दाबी गर्दै सूचना प्रविधिमा हुने अनियमितता नियन्त्रणमा कायापलट आएको बताए।

तर, ठूला भ्रष्टाचारमा संलग्नहरूविरुद्ध कारबाही गर्न कर्मचारीहरू स्वयंले जानकारी दिन नचाहेकाले समस्या हुने गरेको उनको भनाइ थियो। ‘बलिको बोको त कर्मचारी मात्रै भयो,’ राईले भने, ‘उपल्लो तहका व्यक्तिलाई कारबाही गर्न प्रमाणसहित बयान चाहिन्छ, तर उनीहरूले नाम लिनै चाहँदैनन्।’

राईले अख्तियारले ठूला गिरोहहरूमा अनुसन्धान गरिरहेको बताउँदै भ्रष्टाचारविरुद्ध सबै तहबाट साथ र सहयोग आवश्यक रहेको धारणा राखे।