मिर्गौला प्रत्यारोपणपश्चात सगरमाथाको सफल आरोहण गर्ने कीर्तिमानी आरोही सोलुखुम्बुका पेम्बा शेर्पालाई सम्मान गरिएको छ ।
स्वास्थ्य तथा जनसंख्या मन्त्रालयमा एक कार्यक्रम गरी मन्त्री प्रदीप पौडेलले विश्वरेकर्ड कायम गरेको भन्दै इतिहास रचेकामा बधाई दिए । ‘नेपाल मात्र नभएर विश्वमै रेकर्ड कायम गर्नुभएको छ,’ मन्त्री पौडेलले भने, ‘तपाईंलाई मन्त्रालयले प्रत्यारोपण प्रवर्धनदूतका रुपमा नियुक्त गर्नेछ ।’
अझै पनि मष्तिष्कमृत्युपश्चात दान गरेर मानिसको ज्यान बचाउन सकिने भए पनि दाता पर्याप्त पाउन नसकिएको उदाहरण प्रस्तुत गर्दै शेर्पाको आरोहणमार्फत सचेतना फैलाउन सकिने पौडेलले विश्वास व्यक्त गरे ।
‘मष्तिष्क मृत्युपछि अंगदान दिने विषयलाई सहज र सरल बनाउन प्रयास थालेका छौं,’ उनले भने, ‘यसले अंग अभावमा ज्यान गुमाउन बाध्य धेरैको जीवनरक्षा हुने आशा छ ।’ उनले सगरमाथा आरोहणको जोखिम मोल्ने भए पनि भरियाहरुको बिमाका लागि पहल गर्ने घोषणा पनि गरे ।
आरोही शेर्पाले यस आरोहणले आफूमा साहस र आत्मविश्वास झनै बढेको बढाए । ‘मैले मिर्गौला प्रत्यारोपण गरेको दुई वर्षभित्रै आरोहण थालेको थिएँ,’ उनले भने, ‘आफ्नो ज्यान बचाउने अस्पताललाई दिएको बाचा ज्यानको बाजी राखेर पूरा गरें ।’
वैदेशिक रोजगारीका क्रममा मिर्गौला फेल भएको पत्ता लागेपछि स्वदेश फर्किएका शेर्पाले तीन वर्षअघि सहिद धर्मभक्त राष्ट्रिय प्रत्यारोपण केन्द्रमा मिर्गौला प्रत्यारोपण गरेका थिए ।
सन् २००२४ मार्च २२ मा लोबुचे हिमाल आरोहण गरेका शेर्पाले गत मे १४ मा सगरमाथा आरोहण गर्दै कीर्तिमान कायम गरेका हुन् । स्वास्थ्यमन्त्रीले नागरिकको स्वास्थ्य सुधारमा राम्रो काम गरिरहेको भन्दै उनले प्रशंसासमेत गरे ।
