प्रतिनिधिसभाको बैठक आज दिउँसो ३ बजे बस्दैछ ।
जेठ १३ गतेदेखि नियमित कार्यसूचीमा प्रवेश नगरी स्थगित हुँदै आएको प्रतिनिधिसभाको बैठक खुलाउन पटक पटक सत्तापक्ष र विपक्षी दलबीच छलफल भएपनि सहमति भने हुन सकेको छैन । भिजिट भिसा प्रकरणको बिषयलाई लिएर विपक्षी दलहरूले लगातार बैठक अवरुद्ध गर्दै आएका छन् ।
आजको बैठकमा उपप्रधानमन्त्री एवम् अर्थमन्त्री विष्णुप्रसाद पौडेलले वक्तव्यसहित ‘आर्थिक वर्ष २०८२–८३ को राजश्व र व्ययको वार्षिक अनुमानमाथि सामान्य छलफल गरियोस्’ भन्ने प्रस्ताव पेस गर्ने र सो प्रस्तावमाथि छलफल हुने कार्यसूची सार्वजनिक गरेको छ ।
त्यसैगरी राज्य व्यवस्था तथा सुशासन समितिका सभापति रामहरि खतिवडाले ‘सङ्घीय निजामती सेवा विधेयकसम्बन्धी समितिको प्रतिवेदन, २०८२ ’ पेस गर्ने र सभामुख देवराज घिमिरेले प्रधानमन्त्री तथा मन्त्रिपरिषद्को कार्यालयबाट प्राप्त कार्यभार सम्बन्धी पत्रहरूबारे जानकारी गराउने कार्यसूची रहेको संसद् सचिवालयले जनाएको छ ।
