चितवन, असार १३ :
नेपाली कांग्रेसका सभापति शेरबहादुर देउवाले सत्तारुढ दल एमालेसँग बेलाबेलामा असमझदारी देखिनु स्वाभाविक रहेको बताएका छन् ।
फरक राजनीतिक विचारधारा भएका दलहरूबीच सत्तासाझेदारी हुँदा कहिलेकाहीँ मतभेद हुनु सामान्य हुने उनको भनाइ छ ।
चितवनको भरतपुरमा शुक्रबार सञ्चारकर्मीहरूसँग कुरा गर्दै उनले सरकारका केही निर्णयप्रति फरक बुझाइका कारण असमझदारी देखिए पनि यसलाई अनौठो ठान्न नहुने स्पष्ट पारे ।
‘एमाले फरक दल भएकाले कहिलेकाहीँ असमझदारी देखिन्छ । यो स्वभाविक हो,’ सभापति देउवाले भने, ‘तर सरकार आपसी सहमतिमै अघि बढिरहेको छ ।’
उनका अनुसार कांग्रेसको आग्रहपछि सरकारले बजेटमा रहेको ‘टेक एन्ड पे’ व्यवस्था सहज ढंगले हटाएको हो । देउवाले यसलाई सरकारभित्रको समन्वय र सहकार्यको सकारात्मक उदाहरणका रूपमा प्रस्तुत गरेका छन् ।
