काठमाडौं, असार २६ :
त्रिभुवन विश्वविद्यालयको सिनेट बैठक प्रधानमन्त्री निवास बालुवाटारमा बोलाइएकोमा नेपाली कांग्रेस निकट नेपाल विद्यार्थी संघ (नेविसंघ) ले आपत्ति जनाएको छ।
नेविसंघले विधिवत् निर्वाचित विद्यार्थी प्रतिनिधिहरूलाई बेवास्ता गर्दै बालुवाटारमा बैठक बोलाइनु लोकतान्त्रिक मूल्य र विधिमाथिको अपमान भएको बताएको छ। आजलाई तय बैठक अवैधानिक भएको भन्दै संघले तत्काल निर्णय सच्याउन माग गरेको छ।
विज्ञप्तिमा भनिएको छ, ‘विद्यार्थीको सहभागिता बिना हुने कुनै पनि निर्णय गम्भीर अपमान हो।’
संघले उपकुलपति नियुक्तिमा पारदर्शिता नअपनाई सिफारिसको भरमा निर्णय भएको भन्दै विरोध जनाएको छ। यदि विद्यार्थीको आवाज बेवास्ता गरियो भने चरणबद्ध आन्दोलनमा उत्रिने चेतावनी पनि नेविसंघले दिएको छ।
