रुकुमपूर्व, साउन ७ :
रूकुमपूर्वको भूमे गाउँपालिका–५ सेराबाङमा जंगली च्याउको तरकारी खाँदा दुई बालबालिकाको मृत्यु भएको छ भने आमासहित अर्की छोरी सिकिस्त बिरामी भएका छन्।
३५ वर्षीया राजकुमारी विकले साउन २ गते राति जंगलबाट ल्याएको च्याउको तरकारी पकाएकी थिइन्। उक्त खाना खाँदा ३ वर्षीय छोरा योजन विक र ७ वर्षीया छोरी भाग्यरेखा विकको उपचारको क्रममा मृत्यु भएको प्रहरीले जनाएको छ।
गम्भीर अवस्थामा रहेकी राजकुमारीको राप्ती स्वास्थ्य विज्ञान प्रतिष्ठान दाङमा र ९ वर्षीया छोरी आयुषा विकको भेरी अस्पताल नेपालगञ्जमा उपचार भइरहेको छ। प्रहरीका अनुसार साउन २ गते बिरामी परे पनि उनीहरूलाई ५ गते मात्र अस्पताल लगिएको थियो। उपचारमा ढिलाइ हुँदा बालबालिकाको ज्यान गएको जनाइएको छ।
