नेपाली काङ्ग्रेसका उपसभापति एवं प्रतिनिधि सभा सदस्य धनराज गुरुङको पुरानो तस्बिरलाई लिएर सामाजिक सञ्जालमा गलत प्रचार गरिएपछि गुरुङको सचिवालयले आपत्ति जनाएको छ ।
गुरुङको सचिवालयले विज्ञप्ति जारी गर्दै सामाजिक सञ्जालमा भएको गलत प्रचारप्रति ध्यानाकर्षण भएको जनाएको हो ।
सामाजिक सञ्जालमा सम्बन्ध विच्छेद हुनु पूर्व पत्नी ज्योति गुरुङसँग खिचिएको फोटोलाई हालै न्युयोर्कमा घुमघाम गर्दै खिचिएको फोटो भनी भ्रम पूर्ण प्रचार प्रसार गरिएपछि सचिवालयले ध्यानाकर्षण भएको जनाएको हो ।
'सामाजिक सञ्जालमा प्रचार गरिएको फोटो सम्बन्ध विच्छेद हुनुपूर्व खिचिएको सबैलाई जानकारी गराइन्छ । धनराज गुरुङ संविधानसभा सदस्य भएका बेला उक्त फोटोमा संविधानसभा सदस्यको लोगो प्रस्ट देख्न सकिन्छ ।
२०७६ सालमा सम्बन्ध विच्छेद भइसकेको हुँदा हाल आएर उक्त तस्विर राजनैतिक प्रतिशोधका कारण प्रचार गरिएको सचिवालयको ठहर छ, विज्ञप्तिमा भनिएको छ ।
व्यक्तिको चरित्र हत्या गर्ने उद्देश्यले सामाजिक सञ्जालमा फोटो राख्नेलाई सञ्जालको दुरुपयोग नगर्न सचिवालयले आग्रह समेत गरेको छ ।
सामाजिक सञ्जालको दुरुपयोग गरी चरित्रहत्या गर्ने कार्य नरोकिएका कानुनी उपचारको बाटो अपनाउन बाध्य हुने समेत सचिवालयले चेतावनी दिएको छ ।
