संसद्मा प्रतिनिधित्व गर्ने दलहरुबीच सिंहरदरबारमा छलफल भएको छ । माओवादी केन्द्रको संसदीय दलको कार्यालयमा भएको बैठकमा निर्वाचन आयोगले राजनीतिक दलहरुलाई पठाएको राजनीतिक दलसम्बन्धी स्वमूल्यांकन कार्यविधि, २०८२ बारे छलफल भइरहेको जनाएको छ ।
आयोगले त्यसबारेमा सुझाव दिन दलहरुलाई भोलिसम्मको समय दिएको छ ।छलफलमा सबैजसो दलका नेताहरु सहभागि छन् । प्रमुख सत्तारुढ दल नेकपा एमाले र नेपाली कांग्रेसका नेताहरु भने उपस्थित छैनन् ।
राजनीतिक दलसम्बन्धी स्वमूल्याङ्कन कार्यविधि, २०८२’का प्रावधानहरु वर्तमान संविधान, ऐन र कानुनविपरीत रहेको भन्दै विपक्षी दलहरु छलफलमा जुटेका हुन् । उनीहरुले यस विषयमा छलफल गरी साझा धारणा बनाउने बताइएको छ ।
आयोगको कार्यविधिको बुँदा नम्बर ५ मा मूल्यांकन समितिको व्यवस्था छ ।कार्यविधिमा मूल्यांकन समितिले नै दलहरू सञ्चालन गर्ने भन्ने अधिकार दिइएको प्रति दलहरूले आपत्ति जनाएका छन् । राजनीतिक दलको स्वमूल्यांकन प्रणालीको सञ्चालन, रेखदेख र निर्देशन गर्न सचिव संयोजकत्वको समितिमा आयोगका महाशाखा प्रमुखहरू, सूचना प्रविधि शाखा प्रमुख, ऐन, नियम तथा फैसला कार्यान्वयन शाखा प्रमुख सदस्य रहने व्यवस्था गरिएको छ ।
