मुख्यमन्त्री बानियाँलाई मत दिन कांग्रेसको ह्विप

नेपाली कांग्रेस बागमती प्रदेश संसदीय दलले दलका नेता एवं मुख्यमन्त्री इन्द्रबहादुर बानियाँको अध्यक्षतामा काठमाडौंमा बसेको बैठकले विभिन्न निर्णय गरेको छ ।

संसदीय दलको शनिबार बसेको बैठकले नेपालको संविधानको धारा १६८ को उपधारा (४) तथा प्रदेश सभा नियमावली २०७४ को नियम १४३ को उपनियम (१) बमोजिम बाग्मती प्रदेशसभाको बैठकमा विश्वासको मत प्राप्त गर्ने प्रस्ताव पेस गर्न प्रदेशसभाको यही साउन २७ गते मंगलबार दिउँसो ४ बजे बस्ने गरी आह्वान गरेको छ ।

उक्त बैठकमा आफ्ना सदस्यहरुलाई अनिवार्य उपस्थिति हुन, तटस्थ नहुन र विश्वासको मतको पक्षमा मतदान गर्न नेपाली कांग्रेसको संसदीय दलको विधान २०७४ को धारा १२ को उपधारा ६ बमोजिम गर्न ह्विप जारी गरिएको छ ।

यसैगरी बैठकले संसदीय दल कार्यसमिति गठन गरेको छ । प्रदेश सदस्यहरु श्रीराम लामिछाने, सुना परियार, मीनकृष्ण महर्जन, सुरजचन्द्र लामिछाने तथा नेपाली कांग्रेस बागमती प्रदेश समितिको महामन्त्रीद्वय राजु श्रेष्ठ र कञ्चनचन्द्र बादे सदस्य छन् ।

यसैगरी बैठकले तीन सदस्यीय अनुशासन समिति गठन गरेको छ । यो समितिमा छिरिङदोर्जे लामा, विनु रायमाझी पौडेल र सुरजचन्द्र लामिछाने छन् ।