भूमि सम्बन्धी ऐन संशोधन विधेयकको विरोधमा जनता समाजवादी पार्टी (जसपा) नेपालले आजदेखि देशभर सहरकेन्द्रित आन्दोलन सुरु गरेको छ ।
पार्टीले साउन ९ देखि भदौ १५ गतेसम्म देशभर विभिन्न ठाउँमा प्रदर्शन गर्ने कार्यक्रम तय गरेको छ । जसपाले प्रस्तावित विधेयकमा हदबन्दी छुटको दुरुपयोग, अव्यवस्थित बसोबासीलाई जग्गा बाँड्ने व्यवस्था र चुरे क्षेत्रको संरक्षणमा असर पर्ने कुरा रहेको भन्दै आपत्ति जनाउँदै आएको छ ।
जसपाका नेता दीपक कार्कीले आन्दोलनका लागि पहिल्यैदेखि जिल्ला र प्रदेश संगठनहरूलाई सर्कुलर पठाइसकेको जानकारी दिए ।
उनले भदौ १५ गतेसम्म आन्दोलन गरेपछि सरकारले आवाज सुन्छ भन्ने विश्वास व्यक्त गरे । तर, सरकारले बेवास्ता गरे परिस्थिति बदलिन सक्ने चेतावनी पनि दिए । ‘सरकारले बेवास्ता गरे सडक र सदन दुवै स्थानबाट आन्दोलनलाई निरन्तरता दिन्छौं,’ नेता कार्कीले भने ।
जसपाले आन्दोलनलाई चरणबद्ध रूपमा सञ्चालन गर्दै सरकारको ध्यानाकर्षण गराउने रणनीति बनाएको छ । पार्टीले सरकारले विधेयक फिर्ता नलिए आन्दोलन अझ कडा बनाउने जनाएको छ ।
