इजरायली सेनाले गाजा सिटीमा रहेको एक भवनमा आक्रमण गरेको छ । आक्रमणबाट भवन पुर्णरुपमा ध्वस्त भएको छ ।
रक्षामन्त्री इजरायल काट्जले सो भवन भत्किएको भिडियो एक्समा पोस्ट गर्दै “हामीले जारी राखिरहेका छौँ” भनेर लेखेका थिए ।
गाजामा आफ्नो कारबाही विस्तार गरिरहेको इजरायल डिफेन्स फोर्सेसले सुसी टावर हमासले प्रयोग गरिरहेको दाबी गरेको छ तर हमासले यो आरोप अस्वीकार गरेको छ।
यस आक्रमणमा मृत्यु वा घाइतेको बारेमा तत्काल जानकारी प्राप्त भएको छैन। शनिबारको आक्रमण अघि इजरायलले पर्चा खसाल्दै फिलिस्तिनीहरूलाई दक्षिणतर्फको मानवीय क्षेत्र भनिएको स्थानमा जान पुनः आग्रह गरेको थियो।
फोर्सका अरबी भाषाका प्रवक्ता अविचाय अद्राईले सामाजिक सञ्जालमा पोस्ट गर्दै गाजावासीलाई “पहिले नै गएका हजारौं मानिसहरूसँग सामेल हुन” आग्रह गरेका थिए। उनले खान युनिस र तटबीच पर्ने अल-मावासीमा जान सुझाएका थिए।
फोर्सले बारम्बार नागरिकहरूलाई त्यहाँ जान प्रोत्साहित गर्दै त्यहाँ स्वास्थ्य उपचार, खानेपानी र खाद्यान्न उपलब्ध गराइने बताएको छ।
तर संयुक्त राष्ट्रसंघले अल-मावासीका टेन्ट शिविरहरू अत्यधिक भीडभाड र असुरक्षित रहेको र दक्षिणका अस्पतालहरू भरिभराउ भएको जनाएको छ।
मंगलबार अल-मावासीमा पानी लिन लाइनमा उभिएका पाँच बालबालिकाको मृत्यु भएको थियो। प्रत्यक्षदर्शीहरूले उनीहरूलाई इजरायली ड्रोनले आक्रमण गरेको बताएका थिए। फोर्सले यो घटना समीक्षामा रहेको प्रतिक्रिया दिएको छ।
गाजा सिटीमा इजरायलले दर्जनौं भवन ध्वस्त पारेको छ ।
अनादोलु भिया गेट्टी इमेजमा देखाइएको तस्वीरमा गाजाको पश्चिम भागमा रहेको मुश्ताहा टावर आक्रमणपछि विशाल धुवाँको मुस्लो आकाशमा उठेको देखिन्छ। भवन भत्किन सुरु गरेको देखिन्छ र अगाडिपट्टि दुई व्यक्ति देखिन्छन्।
गाजा सिटीको पश्चिममा रहेको मुश्ताहा टावर शुक्रबार ध्वस्त गरिएको थियो। यो सँगै सुसी टावर लगातार दुई दिनमा ध्वस्त गरिएका दोस्रो उच्च-तल्लाको भवन हो। शुक्रबार सामाजिक सञ्जालमा आएको भिडिओमा अल-रिमाल क्षेत्रमा रहेको मुश्ताहा टावरको आधारमा भएको ठूलो विस्फोटपछि टावर भत्किएको देखिन्छ।
फोर्सले नागरिक क्षति कम गर्न जनतालाई अघि नै चेतावनी दिने र सटीक हतियार प्रयोग गर्ने जस्ता सावधानीका उपायहरू अपनाएको दाबी गरेको छ।
तर फिलिस्तिनीहरूले भने मुश्ताहा टावरमा विस्थापित परिवारहरू बसिरहेका थिए भनेका छन्। गाजाको नागरिक सुरक्षा एजेन्सीका प्रवक्ता महमुद बास्सालले इजरायलमाथि जबरजस्ती विस्थापनको नीति अपनाएको आरोप लगाएका छन्।
उपग्रह चित्रहरूले देखाएको अनुसार गाजा सिटीका केही क्षेत्रमा पछिल्लो एक महिनामा इजरायली आक्रमण र ध्वंसका कारण दर्जनौं बस्तीहरू पूर्ण रूपमा ध्वस्त भएका छन्।
गाजा सिटीका आवासीय र व्यावसायिक टावरहरू शहरको इतिहाससँग जोडिएका थिए जसले इजरायली कब्जा अन्त्य गर्ने र स्वतन्त्र फिलिस्तीनी राष्ट्र निर्माण गर्ने आशालाई प्रतिनिधित्व गर्थे।
