सरकार गठनका लागि भइरहेका छलफलहरूबीच जेनजी समूहभित्र नेतृत्वको विषयमा मतभेद चुलिँदै गएको छ। बुधबार दिउँसो जंगीअड्डामा भएको छलफलका क्रममा जेनजी प्रतिनिधिले पूर्वप्रधानन्यायाधीश शुशीला कार्कीको नाम सरकार प्रमुखको रूपमा सिफारिस गरेपछि समूहभित्र व्यापक असन्तुष्टि देखिएको छ।
सिफारिसको समाचार सार्वजनिक भएसँगै जंगीअड्डाबाहिर भेला भएका युवाहरुले विरोधमा नाराबाजी गर्न थालेका छन्। कतिपय प्रदर्शनकारीहरूले काठमाडौं महानगरपालिकाका मेयर बालेन शाह, सामाजिक अभियन्ता र स्वतन्त्र नेतृत्वदायी भूमिका निभाइरहेका अन्य व्यक्तिहरूको नाम अगाडि सार्दै कार्कीको उम्मेदवारीमाथि प्रश्न उठाएका छन्।
सेनाले वार्ताका लागि पहल गर्दै सरकारको नेतृत्वको सिफारिस गर्न आग्रह गरे पनि जेनजी समूहभित्र साझा निर्णयमा पुग्न कठिन भइरहेको छ। नेतृत्व र नीति–कार्यदिशाका विषयमा मतभेद बढिरहेका बेला करिब ४ हजारभन्दा बढी जेनजी सदस्यहरूले भर्चुअल मिटिङमार्फत नेतृत्व र भावी रणनीति तय गर्ने प्रयास गरे पनि ठोस निष्कर्षमा पुग्न सकेका छैनन्।
नेतृत्वको स्पष्टता नहुँदा सरकार गठनको प्रक्रिया ढिलाइ भएको आम सर्वसाधारणको बुझाइ छ। राजनीतिक रिक्तता चुलिँदै गएको वर्तमान अवस्थामा जेनजी समूहभित्र एकरूपता र सहमति नहुनु नै मूल अवरोधका रूपमा देखिएको छ। जेनजी समूहभित्र बढ्दो असहमति र बाहिरको चापकाबीच जेनजी नेतृत्व कसरी अघि बढ्नेछ भन्ने चासो बढ्दै गएको छ।
