दशैंको मुखमा यात्रु चापसँगै देशका विभिन्न भागमा सडक दुर्घटनाको घटना बढ्न थालेको छ। सोमबार बिहान मात्रै सिन्धुली र खोटाङमा भएका दुई छुट्टाछुट्टै सवारी दुर्घटनामा कम्तीमा १९ जना घाइते भएका छन्।
काठमाडौंबाट धापचौकीतर्फ आइरहेको बा २० च ९३१ नम्बरको बोलेरो पिकअप गाडी सोमबार बिहान ११:४५ बजे सिन्धुलीको सुनकोशी गाउँपालिका–६, भालुखोलास्थित बीपी राजमार्ग अन्तर्गत मरिन डाइभर्सन नजिकै दुर्घटना भएको छ। गाडी आफैँ अनियन्त्रित भई सडकबाट करिब ५० मिटर तल खसेको प्रहरीले जनाएको छ।
दुर्घटनामा चालकसहित १३ जना घाइते भएका छन्। उनीहरूको खुर्कोटस्थित सुनकोशी सामुदायिक अस्पतालमा उपचार भइरहेको छ।
यता, काठमाडौंबाट दिक्तेल जाँदै गरेको ना १ ज ६०९४ नम्बरको सुमो गाडी खोटाङको अर्खौलेस्थित बिजुलेमा सोमबार बिहान करिब ९ बजे दुर्घटनामा परेको छ। मध्यपहाडी लोकमार्ग अन्तर्गत पर्ने उक्त स्थानमा गाडी अनियन्त्रित भई सडकबाट करिब १० मिटर तल खसेको हो।
दुर्घटनामा ७ जना यात्रु घाइते भएका छन्। तीमध्ये दुई जनाको जिल्ला अस्पताल खोटाङमा उपचार भइरहेको छ भने अन्य ५ जनालाई उपचारपछि डिस्चार्ज गरिएको छ।
गाडीमा १३ जना यात्रु सवार थिए। चालक विक्रम कार्कीलाई प्रहरीले नियन्त्रणमा लिएको छ। बढ्दो चाडपर्व यात्राको चाप र खराब सडक अवस्थाका कारण यस्ता दुर्घटनाको जोखिम अझै उच्च रहेको ट्राफिक प्रहरीको भनाइ छ। यात्रुहरूलाई सावधानीपूर्वक यात्रा गर्न, क्षमता भन्दा बढी यात्रु चढेको गाडी चढ्न नहुन र मौसम तथा सडक अवस्थाबारे जानकारी लिएर मात्र यात्रा गर्न सम्बन्धित निकायले आग्रह गरेको छ।
