सरकारले मधेश प्रदेशका नयाँ प्रदेश प्रमुखका रूपमा सुरेन्द्र लाभ कर्णलाई नियुक्त गर्न सिफारिस गरेको छ। सोमबार साँझ बसेको मन्त्रिपरिषद् बैठकले हालकी प्रदेश प्रमुख सुमित्रा सुवेदी भण्डारीलाई पदमुक्त गरी कर्णलाई नियुक्तिका लागि राष्ट्रपति समक्ष सिफारिस गर्ने निर्णय गरेको हो।
सरकारका प्रवक्ता तथा सञ्चार, सूचना तथा प्रविधिमन्त्री जगदीश खरेलका अनुसार, मन्त्रीपरिषद्ले राजनीतिक विवादमा मुछिएकी प्रदेश प्रमुख सुवेदीलाई हटाएर नयाँ नेतृत्व सिफारिस गर्ने निर्णय गरेको हो।
मधेश प्रदेशमा पछिल्ला महिनाहरूमा राजनीतिक शक्ति सन्तुलन र दलगत विवादका कारण प्रदेश प्रमुख सुवेदी आलोचनामा परेकी थिइन्। त्यसपश्चात सरकारले उनलाई पदमुक्त गरी नयाँ अनुहारको रूपमा सुरेन्द्र लाभ कर्णलाई अगाडि सारेको हो।
को हुन् सुरेन्द्र लाभ कर्ण?
सुरेन्द्र लाभ कर्ण राजनीतिक विश्लेषक, शिक्षाविद् र मधेश मामिलाका विज्ञ हुन्। उनले अर्थशास्त्रमा पीएचडी गरेका छन् र लामो समय जनकपुरस्थित रामस्वरूप रामसागर बहुमुखी क्याम्पस (राराव) मा प्राध्यापन गरेका थिए।
कर्ण सन् २०७८ सालमा राष्ट्रिय योजना आयोगका सदस्य समेत बनेका थिए। उनले संघीयता, मधेश नीति र आर्थिक विकासका विषयमा विभिन्न अनुसन्धान र लेखन गर्दै आएका छन्।
कर्णलाई व्यावसायिक दक्षता र नीति निर्माणमा दीर्घ अनुभव भएको व्यक्तिका रूपमा चिनिन्छ। राजनीतिक पृष्ठभूमि नभए पनि उनी मधेशका सामाजिक–आर्थिक विषयमा प्रष्ट दृष्टिकोण राख्ने विज्ञका रूपमा परिचित छन्।
