आईजीपी कार्कीले सम्बोधनका क्रममा ‘अमर प्रहरी’ लाई सम्झिँदा भक्कानिए

नवनियुक्त प्रहरी महानिरीक्षक दानबहादुर कार्की दर्ज्यानी चिह्न लगाएपछि सम्बोधनका क्रममा भावुक बनेका छन्। सम्बोधनको सुरुवातमै ‘अमर प्रहरी’को प्रसंग आउँदा उनी भक्कानिएका थिए।

कार्कीले भनाइ सुरु गर्दै, ‘म सर्वप्रथम राष्ट्र र नागरिक सेवाका क्रममा वीरगति प्राप्त गर्नुभएका…’ भनेपछि उनका गला अवरुद्ध भएका थिए। केही क्षण रोकिएर उनले अगाडि रहेको टिस्यु पेपरले आँखा र नाक पुछेपछि मात्र सम्बोधन जारी राखेका थिए। हुन पनि जेनजी आन्दोलनका क्रममा तीनजना प्रहरी कर्मचारीले ज्यान गुमाएको तस्विर सवैको मानस्पटलमा ताजैछ ।

उनीले आफूले पाएको विशिष्ट जिम्मेवारी पारदर्शी र जवाफदेहिताका साथ पूरा गर्ने प्रतिबद्धता जनाए । नागरिकमा सेवा भावको पूर्ण प्रत्याभूति दिलाउने आश्वासन समेत दिए ।

प्रहरी नियमावलीअनुसार ३० वर्षे सेवा अवधिका कारण अघिल्ला प्रहरी महानिरीक्षक चन्द्रकुवेर खापुङ २६ कात्तिक राति १२ बजेबाट अनिवार्य अवकाशमा गएपछि नेपाल प्रहरीको कमाण्ड अब कार्कीको नेतृत्वमा आएको हो।

त्यसो त निर्वतमान आईजीपी चन्द्रकुवेर खापुङले पनि खुलेरै प्रहरी संठगन र तत्लो तहका सिपाहीको पक्षमा खुलेर बोल्दै आएका थिए । जेनजी आन्दोलनमा प्रहरीको मनोबल कम्जोर पार्ने काम भएको जनाउँदै नीतिगत रुपमा नै संगठनलाई बलियो बनाउनु पर्छ भन्नेमा खापुङले जोड दिँदै आएका छन् । 

जुनसुकै आन्दोलन भए पनि सुरुमा नै प्रहरीका तत्लो तहका कर्मचारीलाई बोलाएर सोधपुछ गर्ने परम्पराको उनले विरोध गरेका छन् । राज्यले दिएको जिम्मेवारी पूरा गर्नु प्रहरीको कर्तव्य हो, खापुङको भनाइ छ ।वर्तमान आईजीपीले पनि खापुङकै बाटो आत्मसाथ गर्ने देखिन्छ ।