फाइल तस्बिर ।
प्रधानमन्त्री सुशीला कार्कीले आगामी फागुन २१ गते निर्धारित प्रतिनिधिसभा निर्वाचनबाट कुनै पनि दल दायाँ–बायाँ नहुन चेतावनी दिएकी छन्। बुधबार सिंहदरबारमा राजनीतिक दलका प्रतिनिधिसँग छलफल गर्दै उनले संसद् पुनःस्थापना र निर्वाचन बहिष्कारजस्ता गतिविधिले देशलाई पुनः अस्थिरतातर्फ लैजाने बताइन्।
प्रधानमन्त्री कार्कीकाअनुसार मंसिर १० गतेभित्र दल दर्ता अनिवार्य रहेको छ। दल दर्ता नगर्ने वा चुनावबाट भाग्ने दललाई लोकतान्त्रिक जिम्मेवारीभन्दा ‘अराजकता रोजेको’ ठहरिने चेतावनी उनले दिइन्।
हेट स्पीच, द्वेषपूर्ण अभिव्यक्ति र आचारसंहिता उल्लंघनमा कडा कारबाही हुने बताउँदै कार्कीले निर्वाचन आयोगलाई सबल बनाउने, प्रचार अवधि २१ दिनमा सीमित गर्ने र अनावश्यक खर्च रोक्ने सरकारको प्रतिबद्धता दोहोर्याइन्।
जेन–जी युवाहरूको भदौ २३–२४ को आन्दोलनलाई सकारात्मक सहभागितामा रूपान्तरण गर्ने उद्देश्यले कानुनी सुधारमार्फत युवा भूमिकालाई बढाइने उनको भनाइ छ। चुनाव सुरक्षित, भयरहित र विश्वसनीय बनाउन संवेदनशील क्षेत्र विशेष निगरानीमा राखिएको पनि उनले बताइन्।
