फाइल तस्बिर ।
उज्यालो नेपाल पार्टीका संरक्षक तथा ऊर्जामन्त्री कुलमान घिसिङले सबै वैकल्पिक राजनीतिक शक्तिहरूसँग सम्मानजनक ढंगले सहकार्य गरेर अगाडि बढ्न आफूहरू तयार रहेको बताएका छन्।
आइतबार पोखरामा आयोजित कार्यकर्ता भेलालाई सम्बोधन गर्दै घिसिङले सहकार्य गर्दा सबै पक्षको आत्मसम्मान, स्वाभिमान र पहिचान कायम हुनुपर्नेमा जोड दिए।वैकल्पिक शक्तिहरूसँग सहकार्यका विषयमा निरन्तर संवाद भइरहेको जानकारी दिँदै घिसिङले सकेसम्म सबै एक भएर जानुपर्ने धारणा राखे।
‘वैकल्पिक शक्तिहरू सबै एक भएर जानुपर्छ। यदि पूर्ण एकता सम्भव भएन भने पनि कार्यगत एकता गरेर अगाडि बढ्ने अवस्थामा हामी छौँ,’ उनले बताए।
यसका लागि उनले नयाँ र स्थापित (मेनस्ट्रिम) राजनीतिक शक्तिहरूलाई समेत सहकार्यका लागि आह्वान गरे। उनले नेपाली जनताले पनि वैकल्पिक शक्तिहरू एकजुट भएको देख्न चाहेको उल्लेख गरे।
यसैबीच, राष्ट्रिय स्वतन्त्र पार्टी (रास्वपा)का अध्यक्ष रवि लामिछाने र काठमाडौँ महानगरपालिकाका मेयर बालेन शाहबीच आइतबार बिहान सहकार्य गर्दै अगाडि बढ्ने सहमति भएको छ। उक्त सहमतिका लागि गत एक सातादेखि भएका विभिन्न छलफलमा घिसिङ पनि सहभागी थिए। तर अन्तिम चरणमा भने घिसिङको सहभागिताबिना नै लामिछाने र शाहबीच सहमति भएको बताइएको छ।
