काठमाडौं, माघ १ :
गगन थापा नेतृत्वमा रहेको नेपाली कांग्रेसको पहिलो केन्द्रीय कार्य समिति बैठक बसेको छ । दोस्रो विशेष महाधिवेशनबाट बुधबार निर्वाचित केन्द्रीय कार्य समितिको बैठक ललितपुरको कुपन्डोलस्थित एक पार्टी प्यालेसमा बसेको हो ।
बैठकमा विशेष महाधिवेशनपछि पार्टीका आगामी कार्यदिशा, संगठनात्मक व्यवस्थापन तथा प्रशासनिक विषयमा छलफल भएको बताइएको छ ।
बैठकपछि विशेष महाधिवेशनको नतिजा अद्यावधिक गर्न कांग्रेसको एक टोली आजै निर्वाचन आयोग जाने भएको छ । विशेष महाधिवेशनमार्फत नयाँ नेतृत्व चयन भएकाले पार्टीको अधिलेख अद्यावधिक गर्न आयोगमा आवश्यक कागजात पेस गर्न लागिएको हो ।
नेपाली कांग्रेसले विशेष महाधिवेशनसँग सम्बन्धित सम्पूर्ण कागजात तथा अभिलेखहरू निर्वाचन आयोगमा दस्तावेजीकरण गर्ने जनाएको छ ।
