कोलम्बियाको उत्तरपूर्वी नोर्टे दे सान्तान्देर विभागको ग्रामीण क्षेत्रमा विमान दुर्घटना हुँदा विमानमा सवार सबै १५ जनाको मृत्यु भएको छ।
मृतकमध्ये एक जना स्थानीय सांसद पनि रहेको अधिकारीहरूले बताएका छन्।
उक्त उडान सञ्चालन गर्ने सरकारी स्वामित्वको विमान कम्पनी साटेनाका अनुसार कुरासिका समुदायका स्थानीय अधिकारीहरूले विमान खसेको स्थानबारे जानकारी दिएपछि उद्धार टोली खटाइएको थियो । कोलम्बियाको यातायात मन्त्रालयले विमानमा रहेका कुनै पनि व्यक्ति जीवित नरहेको पुष्टि गरेको छ ।
HK4709 दर्ता नम्बरको उक्त विमान स्थानीय समयअनुसार बिहान ११:४२ बजे विभागीय राजधानी कुकुटा विमानस्थलबाट उडेको थियो र पहाडी क्षेत्रले घेरिएको ओकान्या नगरपालिकातर्फ गइरहेको थियो। उक्त उडान सामान्यतया करिब ४० मिनेट लाग्ने बताइएको छ।
साटेनाले जारी गरेको विज्ञप्तिअनुसार विमानले उडान भरेको केही मिनेटमै हवाई यातायात नियन्त्रण टावरसँग अन्तिम सम्पर्क भएको थियो।
विमानमा २ जना चालकदलका सदस्य र १३ जना यात्रु सवार थिए। यात्रुहरूमध्ये आफ्नो क्षेत्रमा आन्तरिक सशस्त्र द्वन्द्वका पीडितहरूको प्रतिनिधित्व गर्ने सांसद डायोजेनेस क्विन्तेरो पनि थिए। क्विन्तेरोको टिमका सदस्यहरू तथा आगामी मार्चमा हुने संसदीय निर्वाचनका उम्मेदवार कार्लोस साल्सेडो पनि विमानमै सवार थिए।
क्विन्तेरो भेनेजुएलासँगको समस्याग्रस्त सीमावर्ती क्षेत्रमा परिचित मानवअधिकार रक्षक थिए जहाँ उनी जन्मेका थिए र जहाँ यो दुर्घटना भएको हो।
पेशाले वकिल रहेका क्विन्तेरो सन् २०२२ मा कोलम्बियाको तल्लो सदनका १६ प्रतिनिधिमध्ये एक का रूपमा निर्वाचित भएका थिए। यी सिटहरू सन् २०१६ मा कोलम्बिया सरकार र देशको सबैभन्दा ठूलो गुरिल्ला समूह FARC बीच भएको ऐतिहासिक शान्ति सम्झौताअन्तर्गत सिर्जना गरिएका थिए जसको उद्देश्य दशकौँ लामो सशस्त्र द्वन्द्वका ९० लाखभन्दा बढी पीडितहरूको प्रतिनिधित्व गर्नु हो।
उनको पार्टी यू पार्टीले उनको निधनप्रति दुःख व्यक्त गर्दै उनलाई क्षेत्रप्रति प्रतिबद्ध र सेवाभावमा अडिग नेताको रूपमा स्मरण गरेको छ।
कोलम्बियाका राष्ट्रपति गुस्ताभो पेट्रोले सामाजिक सञ्जाल एक्समा लेख्दै दुर्घटनामा आफू गहिरो रूपमा दुःखी भएको बताएका छन्।“मृतकका परिवारप्रति मेरो पूर्ण ऐक्यबद्धता छ। उनीहरूको आत्माले शान्ति पाओस्,” उनले लेखेका छन्।
उप–राष्ट्रपति फ्रान्सिया मार्केजले पनि सामाजिक सञ्जालमा क्विन्तेरोको निधनप्रति शोक व्यक्त गर्दै भनिन्, “यस अपूरणीय क्षतिले सम्पूर्ण देशलाई शोकमा डुबाएको छ। शोकाकुल परिवारहरूप्रति मेरो हार्दिक समवेदना।”
