वरिष्ठ कलाकार सुनील थापाको निधन

वरिष्ठ कलाकार सुनील थापाको आज बिहान  निधन भएको छ ।

आज बिहान थापाथलीस्थित नर्भिक अस्पतालमा उनको निधन भएको हो । हृदयाघातपछि उनलाई अस्पताल लगिएको थियो । नर्भिकका प्रशासन प्रमुख विमल बोगटीले अस्पताल पुग्नुअगावै थापाको निधन भएको बताए ।

कलाकार संघका अध्यक्ष मोहन निरौलाका अनुसार थापाको परिवार नेपालमा छैन । श्रीमती र छोरा मुम्बाईमा बस्दै आएका छन् ।

निरौलाले भने ‘उहाँहरु आइपुग्नुभएपछि मात्र आधिकारिक रुपमा घोषणा गर्ने पारिवारिक तयारी छ ।’

आधिकारिक घोषणा भएपछि मात्र अन्य श्रद्धान्जलीका कार्यक्रमहरु तय गरिने निरौलाले बताए ।

भिडियो फिल्म मसालबाट नेपाली चलचित्रको यात्रा शुरू गरेका उनी चलचित्र चिनोको ‘राते काइला’को भूमिकाले बढी चिनिन्छन् ।