निर्वाचन आयोगले फागुन २१ गते हुने प्रतिनिधि सभा सदस्यको निर्वाचन खर्च बैंक खातामार्फत नगर्ने दल तथा उम्मेदवारलाई कारबाही गर्ने चेतावनी दिएको छ।
बैंक खाता नखोली वा खोलेर पनि बैंकिङ कारोबार नगरी खर्च गर्ने दल वा उम्मेदवारलाई निर्वाचन आचारसंहिता उल्लंघन गरेको आधारमा कारबाही गरिने आयोगका सूचना अधिकारी सुमन घिमिरेले बताए ।
निर्वाचन खर्च पारदर्शी बनाउन आयोगले २५ हजार रुपैयाँभन्दा बढी रकम अनिवार्य रूपमा बैंक खातामार्फत कारोबार गर्नुपर्ने व्यवस्था लागू गरेको छ।
हालसम्म नेपाली कांग्रेससहित ९ वटा राजनीतिक दल र १ हजार ३ सय ८९ उम्मेदवारले बैंक खाता सञ्चालनमा ल्याएका छन् ।
एमाले, राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टी (राप्रपा) लगायतका ठूला राजनीतिक दलहरूले समेत हालसम्म बैंक खाता सञ्चालनमा ल्याएका छैनन् । आयोगले बैंक खाता खोलेर बैंकिङ कारोबारमार्फत मात्र निर्वाचन खर्च गर्न आग्रह गरेको छ ।
