अमेरिकी राष्ट्रपति डोनाल्ड ट्रम्पले मंगलबार ढिलो गरी इरानमाथि विनाशकारी आक्रमण गर्ने धम्कीबाट पछि हटेका छन् ।
अमेरिका र इरानबीच दुई हप्ताको युद्धविराममा सहमति भएको छ । जसमा होर्मुज जलडमरूमध्य पुनः खोल्ने पनि समावेश छ।
ट्रम्पले तेहरानलाई सम्झौतामा सहमत हुन वा इरानको सभ्यता ध्वस्त पार्ने उद्देश्यले पुलहरू र विद्युत् केन्द्रहरूमा आक्रमण सामना गर्नुपर्ने अन्तिम समय सीमा राखेको दुई घण्टाभन्दा कम समयमा युद्ध कम गर्ने निर्णय गरेका हुन्।
इरानको सर्वोच्च राष्ट्रिय सुरक्षा परिषद्ले युद्धविराम स्वीकार गरेको र शुक्रबारदेखि पाकिस्तानमा अमेरिकासँग वार्ता गर्ने जनाएको छ।
तर युद्धविराम कहिलेदेखि लागू हुन्छ भन्ने कुरा न इरानले न अमेरिकाले स्पष्ट पारेका छन् र बुधबार बिहानसम्म इजरायल, इरान र खाडी क्षेत्र भर आक्रमणहरू जारी थिए।
इजरायलले अमेरिका इरानबीचको युद्धविरामलाई समर्थन गरेको छ तर यो सम्झौताले लेबनानमा हिजबुल्लाहसँगको लडाइँ समेट्दैन भन्ने कुरा प्रधानमन्त्री बेन्जामिन नेतान्याहुले बुधबार बिहान बताएका छन्।
उनको कार्यालयले जारी गरेको विज्ञप्तिमा इजरायलले इरानले तुरुन्तै होर्मुज जलडमरूमध्य खोल्ने र अमेरिका,इजरायल तथा क्षेत्रका अन्य देशहरूमाथि हुने सबै आक्रमण रोक्ने सर्तमा ट्रम्पको आक्रमण स्थगन गर्ने निर्णयलाई समर्थन गरेको जनाएको छ।
साथै इजरायलले इरानबाट कुनै पनि आणविक वा क्षेप्यास्त्र खतराको अन्त्य गर्न अमेरिकाले गरिरहेको प्रयासलाई पनि समर्थन गरेको छ।
