आईसीसी क्रिकेट विश्वकप लिग २ अन्तर्गत आज भएको खेलमा नेपालले यूएईलाई ३७ रनले हराएको छ।
नेपालले दिएको २०१ रनको लक्ष्य पछ्याएको यूएई ४८.२ ओभरमा १६३ रनमै अलआउट भयो।
हरप्रित सिंहले ३९, मुहम्मद वसीमले ३४, अक्षदीप नाथले ३० तथा आर्यान्स शर्माले १८ रन जोडे। निलान्स केसवानीले १८ रन जोडे।
बलिङतर्फ नेपालका करण केसीले ९.२ ओभरमा २ मेडेनसहित १९ रन खर्चेर चार विकेट लिए। यस्तै, सन्दीप लामिछानेले १० ओभरमा २ मेडेनसहित २५ रन खर्चेर दुई विकेट लिँदा सोमपाल कामीले ९ ओभरमा ५० रन खर्चेर दुई विकेट लिए।
दीपेन्द्र सिंह ऐरी र ललित राजवंशीले एक–एक सफलता हात पारे।
त्यसअघि कीर्तिपुरस्थित त्रिवि मैदानमा टस हारेर ब्याटिङमा उत्रिएको नेपाल ४८.२ ओभरमा २०० रनमा अलआउट भयो। दीपेन्द्र सिंह ऐरीले अर्धशतकीय इनिङ्स खेल्दै ७६ रन जोडे। ९० बल खेलेका उनले ५ चौका र २ छक्का प्रहार गरे।
बलिङतर्फ यूएईका जुनैद सिद्धिकीले ९.२ ओभरमा ३ मेडेनसहित ३३ रन खर्चेर तीन विकेट लिए भने अजय कुमारले ९ ओभरमा ३४ रन खर्चेर तीन विकेट लिए।
यस्तै खुजैमा तनवीरले दुई तथा हैदर अली र मुहम्मद शहदादले एक एक विकेट लिए।
नेपालले अब अर्को खेलमा बुधबार ओमानसँग खेल्नेछ।
