सल्यानमा भवन निर्माणका लागि जग खन्ने क्रममा ठूलो परिमाणमा बम र विस्फोटक पदार्थ फेला परेको छ ।
शारदा नगरपालिका ३ स्थित जिल्ला प्रहरी कार्यालय सल्यानको परिसरभित्र नयाँ भवनका लागि जग खन्ने क्रममा ती विष्फोटक पदार्थ फेला परेको हो ।
जग खन्ने क्रममा द्वन्द्वकालीन ८६ वटा बम फेला परेका हुन्। जसमध्ये ८२ सकेट बम, ३ सुतली बम र १ वटा बोतल बम रहेको जिल्ला प्रहरी कार्यालय सल्यानले जनाएको छ ।
बुधबार दिउँसो १२:३५ बजेतिर नयाँ भवनको जग खन्ने क्रममा सकेट बमजस्तो देखिने शंकास्पद वस्तु फेला परेको हो । ‘त्यसपछि डिस्पोजका लागि नेपाली सेनाको सिद्धीबक्स गण सल्यानसँग समन्वय गरेर सेना आउँदा उक्त दिन बेलुका ४ बजेसम्म १० वटा सकेट बम फेला परेका थियो ।’
आज बिहान ११:२० बजे पुनः उत्खनन गर्ने क्रममा थप बम फेला परेको हो ।
साथै उत्खनन गर्ने क्रममा थप ७ थान रेडियो सेट (वाकीटाकी), ५०० ग्राम तयारी विस्फोटक पदार्थ, बम बनाउन प्रयोग हुने २ केजी पार्टपूर्जा र १० मिटर फायरिङ केबल समेत फेला परेको प्रहरीले जनाएको छ ।
फेला परेका बमहरू निष्क्रिय पार्न नेपाली सेनाको टोली परिचालन गरिएको छ ।
