भारत काभा महिला भलिबल च्याम्पियनसिपको सेमिफाइनलमा प्रवेश गरेको छ ।
त्रिपुरेश्वरस्थित राष्ट्रिय खेलकुद परिषद्को कभर्ड हलमा सोमबार भएको समूह चरणको अन्तिम खेलमा किर्गिस्तानलाई ३–० को सेटमा पराजित गर्दै समूह बिजेता बन्दै भारत सेमिफाइनलमा प्रवेश गरेको हो ।
खेलमा भारत २५–१४, २६–२४ र २५–१३ ले बिजयी भयो । समूह ए मा भारतसंगै नेपाल पनि सेमिफाइनलमा प्रवेश गरिसकेको छ । पराजित किर्गिस्तान प्रतियोगिताबाट बाहिरिएको छ ।
त्यस्तै सोमबार भएको पहिलो खेलमा बंगलादेशलाई ३–० को सोझो सेटमा पराजित गर्दै श्रीलंकाले सान्त्वना जित निकाल्यो । समूह चरणको अन्तिम खेलमा श्रीलंकाले २५–१९, २५–९ र २५–१३ को जित निकालेको हो ।
समूह बी बाट कजाखस्तान र इरान सेमिफाइनल प्रवेश गरिसकेका छन् । चार टीमबीच वर्गीकरण राउन्ड पछि जेठ १४ गते बिहीबार सेमिफाइनल खेल हुने भलिबल संघले जनाएको छ । फाइनल खेल भने जेठ १५ गते शुक्रबार हुने छ ।
