लगातार सात विश्वकप खेलमा गोल गर्दै मेस्सीले रचे इतिहास, सर्वाधिक गोलको कीर्तिमान पनि थप विस्तार

लियोनेल मेस्सीले शनिबार राति जोर्डनविरुद्ध अर्जेन्टिनाको समूह चरणको अन्तिम खेलमा गोल गर्दै लगातार सात विश्वकप खेलमा गोल गर्ने पहिलो खेलाडी बनेका छन्। यससँगै उनले विश्वकप इतिहासमा आफ्नो सर्वाधिक गोल गर्ने कीर्तिमानलाई १९ गोलसम्म पुर्‍याएका छन्।

मेस्सीले खेलको ८०औँ मिनेटमा पेनाल्टी क्षेत्रबाहिर फाउल भएपछि प्राप्त फ्रिकिकलाई उत्कृष्ट रूपमा गोलमा परिणत गरेका थिए। घाँसको सतह नजिकैबाट प्रहार गरिएको उनको बल जोर्डनका दुई डिफेन्डरबीचबाट छिर्दै गोलपोस्टको देब्रे कुनामा पुगेको थियो।

यो मेस्सीको व्यावसायिक करियरको ७२औँ फ्रिकिक गोल तथा अर्जेन्टिनाका लागि १२औँ फ्रिकिक गोल हो। अन्तर्राष्ट्रिय फुटबलमा उनको गोल संख्या अब २०२ खेलबाट १२३ पुगेको छ। यो कीर्तिमानमा उनी १४५ अन्तर्राष्ट्रिय गोल गरेका क्रिस्टियानो रोनाल्डोपछि दोस्रो स्थानमा छन्।

३९ वर्षीय मेस्सी यसअघि लगातार छ विश्वकप खेलमा गोल गर्ने फ्रान्सका जस्ट फोन्तेन र ब्राजिलका महान् खेलाडी जाइरजिन्होसँग संयुक्त रूपमा कीर्तिमानमा थिए। तर जोर्डनविरुद्धको गोलसँगै उनले लगातार सात विश्वकप खेलमा गोल गर्ने पहिलो खेलाडी बनेर नयाँ इतिहास रचे।

समूह ‘जे’को विजेता बनिसकेको अर्जेन्टिना र नकआउट चरणबाट बाहिरिइसकेको जोर्डनबीचको खेलमा मेस्सी सुरुआती टोलीमा थिएनन्। उनी ६०औँ मिनेटमा लाउटारो मार्टिनेजको स्थानमा मैदान प्रवेश गरेका थिए। पहिलो हाफमा अर्जेन्टिनाका लागि लाउटारो मार्टिनेजले पेनाल्टीमार्फत गोल गरेका थिए।