इस्टाक्वियोको इन्जुरी समयको गोलमा क्यानडा पहिलो पटक विश्वकपको अन्तिम १६ मा

सन् २०२६ फिफा विश्वकपका सह आयोजक क्यानडाले आफ्नो ऐतिहासिक यात्रा जारी राख्दै पहिलो पटक प्रतियोगिताको अन्तिम १६ मा स्थान बनाएको छ।

आइतबार दक्षिण अफ्रिकाविरुद्ध स्टेफन इस्टाक्वियोले इन्जुरी समयको दोस्रो मिनेटमा गरेको निर्णायक गोलले क्यानडालाई विश्वकपको प्रि–क्वार्टरफाइनलमा पुर्‍याएको हो।

२९ वर्षीय मिडफिल्डर इस्टाक्वियोको उक्त गोलले क्यानडाली फुटबल इतिहासमा नयाँ अध्याय थपेको छ। मुख्य प्रशिक्षक जेसी मार्सले दुई वर्षअघि टोलीको जिम्मेवारी सम्हालेपछि निर्माण गर्न थालेको सफल यात्राले यस जितसँगै अर्को ऐतिहासिक उपलब्धि हासिल गरेको हो।

जितपछि मैदानमै खेलाडीहरूलाई घेराएर सम्बोधन गर्दै भावुक बनेका मार्सले भने, “हामीले सुरुदेखि नै आफ्नो योजनामा अडिग रहने, आक्रामक खेल्ने, आफ्नो गुणस्तर देखाउने र चरित्र प्रदर्शन गर्ने कुरा गरेका थियौं। तपाईंहरूले त्यो सबै गरेर देखाउनुभयो।”

उनले थपे, “तपाईंहरू क्यानडाका नायक हुनुहुन्छ। भविष्यमा यो खेल खेल्ने क्यानडाका बालबालिकाका लागि तपाईंहरू प्रेरणा बन्नुभएको छ। तपाईंहरूकै कारण क्यानडामा फुटबलको भविष्य अझ उज्ज्वल बनेको छ।”

मार्सले खेलाडीहरूलाई आफ्नो प्रदर्शनप्रति गर्व गर्न आग्रह गर्दै भने, “तपाईंहरू आफू र आफ्नो प्रदर्शनप्रति गर्व गर्नुस्। तपाईंहरूले अन्तिम क्षणसम्म हार मान्नुभएन र प्रत्येक पल जितका लागि संघर्ष गर्नुभयो।”

प्रशिक्षक मार्सका यी भावनालाई क्यानडाका प्रधानमन्त्री मार्क कार्नीले पनि दोहोर्‍याए। उनी विमानबाट ओर्लिने क्रममा मोबाइल फोनमै खेलको अन्तिम क्षण हेरेका थिए।

खेल सकिएलगत्तै सामाजिक सञ्जालमा प्रतिक्रिया दिँदै कार्नीले लेखे, “कस्तो शानदार खेल! कस्तो उत्कृष्ट टोली! कस्तो महान् देश!”

ओन्टारियो प्रान्तका प्रिमियर डग फोर्डले पनि क्यानडाली टोलीलाई नकआउट चरणमा पुगेकोमा बधाई दिएका छन्। स्टेफन इस्टाक्वियोको जन्म र हुर्काइ ओन्टारियोमै भएको थियो त्यसपछि उनको परिवार पोर्चुगल सरेको थियो। विपक्षी दलका नेता पियरे पोइलिभ्रले पनि टोलीको ऐतिहासिक सफलताको प्रशंसा गरेका छन्।

भ्यानकुभरका मेयर केन सिमले टोलीलाई सन्देश दिँदै भने, “तपाईंहरूले पूरा हृदय लगाएर खेल्नुभयो, मैदानमा सबैथोक दिनुभयो र हामी सबैलाई जीवनभर सम्झिने एउटा अविस्मरणीय क्षण दिनुभयो।”

क्यानडाको जितसँगै सामाजिक सञ्जाल समर्थकहरूको उत्सवले भरिएको थियो। देशभर आयोजित वाच पार्टी र फ्यान फेस्टिभलहरू रातो रङको समुद्रजस्तै देखिएका थिए। दक्षिण अफ्रिकाविरुद्धको खेलका लागि क्यानडा पुगेको लस एन्जलस स्टेडियम पनि सह–आयोजक राष्ट्रका समर्थकहरूले भरिभराउ बनेको थियो।

सामाजिक सञ्जालमा फुटबल विश्लेषक र समर्थकहरूले यो जित क्यानडाका लागि अविश्वसनीय क्षण भएको प्रतिक्रिया दिएका छन्। क्यानडामा आइस हक्की,बास्केटबल र बेसबल फुटबलभन्दा धेरै लोकप्रिय खेल मानिन्छन्।

क्यानडाका चर्चित खेलाडीहरूले पनि राष्ट्रिय फुटबल टोलीको ऐतिहासिक सफलताको खुलेर प्रशंसा गरेका छन्। बहु ओलम्पिक स्वर्ण पदक विजेता पौडीबाज समर म्याकइन्टोस, टेनिस स्टार फेलिक्स ओजे–अलियासिमे र ओलम्पिक च्याम्पियन धावक आन्द्रे डे ग्रासेले सामाजिक सञ्जालमार्फत टोलीलाई बधाई दिएका छन्।

प्रसिद्ध क्यानडाली अन्तरिक्षयात्री क्रिस ह्याडफिल्डले पनि खेलअघि शुभकामना दिएका थिए भने जितपछि टोलीलाई बधाई सन्देश दिएका छन्।

जर्मन क्लब बायर्न म्युनिखले पनि आफ्ना स्टार खेलाडी अल्फोन्सो डेभिसलाई अन्तर्राष्ट्रिय टोलीमा पुनरागमन गरेकोमा बधाई दिएको छ।

मे महिनामा यूईएफए च्याम्पियन्स लिगको सेमिफाइनलका क्रममा ह्यामस्ट्रिङमा चोट बोकेका डेभिस दक्षिण अफ्रिकाविरुद्धको खेलमा ७४औँ मिनेटमा मैदान प्रवेश गरेका थिए। उनको आगमनसँगै क्यानडाको खेलको गति र रणनीतिमा स्पष्ट परिवर्तन देखिएको थियो।