२–० ले पछि परेको अवस्थाबाट शानदार पुनरागमन गर्दै अर्जेन्टिना क्वार्टरफाइनलमा प्रवेश

अर्जेन्टिनाले २–० ले पछि परेको अवस्थाबाट शानदार पुनरागमन गर्दै इन्जुरी समयमा एन्जो फर्नान्डेजको गोलमार्फत ३–२ को अग्रता बनायो। लियोनेल मेस्सीले यसअघि पेनाल्टी चुकाए पनि त्यसको क्षतिपूर्ति गर्दै बराबरी गोल गरे।

टोटेनहमका डिफेन्डर क्रिस्टियन रोमेरोले अर्जेन्टिनाका लागि पहिलो गोल गर्दै टोलीलाई खेलमा फर्काएका हुन् ।

यसअघि एक गोल अफसाइडका कारण रद्द भएका मुस्तफा जिकोले काउन्टर आक्रमणमा इजिप्टका लागि दोस्रो गोल गरे।

यासेर इब्राहिमको हेडर गोलमार्फत इजिप्टले अप्रत्याशित रूपमा सुरुआती अग्रता लिएको थियो।

अब अर्जेन्टिनाले यो जितसंगै क्वार्टरफाइनलमा स्विट्जरल्यान्ड वा कोलम्बियासँग प्रतिस्पर्धा गर्नेछ। यी दुई टोलीबीचको खेल पौने १ बजे हुदैछ ।

लियोनेल मेस्सीले यस वर्षको विश्वकपमा आठौं गोल गर्दै गोल्डेन बुट दौडमा अग्रता बनाए

अर्जेन्टिनाका स्टार फुटबलर लियोनेल मेस्सीले आज राति  इजिप्टविरुद्ध यस वर्षको विश्वकपमा आफ्नो आठौं गोल गर्दै अर्जेन्टिनाका लागि लगातार नौ खेलमा गोल गर्ने आफ्नो श्रृंखलालाई कायम राखेका छन्।

यससँगै उनी गोल्डेन बुटको प्रतिस्पर्धामा शीर्ष स्थानमा उक्लिएका छन्।

मेस्सीको विश्वकप करियरको २१औँ गोल खेलको ८३औँ मिनेटमा गोन्जालो मोन्टिएलको पासमा आएको थियो। उक्त गोलले खेललाई २–२ को बराबरीमा ल्यायो। यसअघि खेलको १९औँ मिनेटमा मेस्सीको पेनाल्टी प्रहार विपक्षी गोलरक्षकले बचाएका थिए।

मेस्सीले अर्जेन्टिनाको पहिलो गोलका लागि पनि महत्वपूर्ण भूमिका खेलेका थिए। उनले ७९औँ मिनेटमा क्रिस्टियन रोमेरोले गरेको हेडर गोलका लागि उत्कृष्ट पास उपलब्ध गराएका थिए।

इजिप्टका यासेर इब्राहिमले १५औँ मिनेटमा हेडरमार्फत गोल गर्दै टोलीलाई सुरुआती अग्रता दिलाएका थिए। त्यसपछि ६७औँ मिनेटमा हैसेम हसनको पासमा मुस्तफा जिकोले इजिप्टका लागि दोस्रो गोल गरेका थिए।

सन् २०२२ मा अर्जेन्टिनाले विश्वकप उपाधि जित्दादेखि मेस्सीले लगातार नौ विश्वकप खेलमा गोल गर्ने कीर्तिमान कायम गरेका छन्। मंगलबारको गोलसँगै उनले ती नौ खेलमा कुल १३ गोल पूरा गरेका छन्।

आफ्नो पहिलो गोल्डेन बुट जित्ने दौडमा मेस्सी मंगलबारको खेलअघि फ्रान्सका किलियन एम्बाप्पे र नर्वेका एर्लिङ हालान्डसँग समान सात–सात गोलमा थिए। दुई असिस्टका कारण एम्बाप्पे टाइब्रेकरमा अगाडि थिए। इंग्ल्यान्डका ह्यारी केन पनि ६ गोलसहित गोल्डेन बुटको प्रतिस्पर्धामा रहेका छन्।